武漢肺炎肆虐全球體壇停擺，球員為保持狀態會喺家中自我訓練，德甲勁旅拜仁慕尼黑就成功復操，不過球隊係以網上視像形式操練（圖），暫代主帥費歷克喺螢幕中同時睇住多位球員如查維馬天尼斯、堤亞高艾簡達拿、基拿比等一隊球員訓練，非常有效率。拜仁球員使用一個名為Zoom嘅視像會議網站，跟住教練費歷克同埋體能教練嘅指導進行健身操練，每節維持75至90分鐘，長度接近平日球隊練習時間，視乎球員要訓練嘅項目。費歷克話，球員戴上運動手錶，我哋可以喺螢幕監察佢哋身體反應如心跳、呼吸等，班球員訓練後有時仲會喺視像中繼續傾偈，大家了解近況，反映咗視像會議現時對球隊有幾重要。