可以借鏡70年前的法拉利。1950年，法拉利當時輸到仆……咗喺條街道好多年，都係贏唔到同樣嚟自意大利嘅愛快羅密歐（車嚟嘅）。咁點算呢？遇上逆境，你唔好當佢好大鑊，你要當佢係機會。好快樂。
當時，法拉利創辦人Enzo同舊東家「愛快」鬥咗超過十年車，都係未贏過。呢啲咪機會囉。所以1950年，法拉利決定跳軌，放底 V12 supercharged 引擎，跳軌研發相對潛力更大、耗油更低、因而可以入少次油嘅 V12 自然吸氣引擎。結果，法拉利呢副新偈喺1950年嘅兩個半月內連環升呢。兩個半月內，引擎馬力多咗幾乎百分之20：
6月18、比利時站：法拉利嘅 V12 自然吸氣引擎處子登場：3,322.34cc、7,000轉時輸出280匹馬力。
7月30、非錦標賽日內瓦站：4,101.6cc、7,000轉時輸出320匹。
9月3、意大利Monza主場：4,493.73cc、7,000轉時輸出330匹。
簡單講，兩個半月內連環加人工兩成。正呀喂。兩個半月內，不可能變可能。點知，法拉利喺Monza主場都只係第二。第二，即係第一個輸，都係未贏到。OOPS。雖然繼續輸，但為信念，法拉利從沒退後；因為堅持，法拉利亦從呢一刻起見到黎明來到。1951年7月14號英國站，架375終於為法拉利賽車隊贏到歷來第一場 F1 冠軍。抗戰13年之後首次擊敗愛快，為法拉利嘅時代革命揭開序幕。（圖）
資料來源：Henry, Alan. Ferrari: The Grand Prix Cars. 2nd ed. Surrey: Hazleton Publishing, 1989. 21-27 p.
體育主持 丹尼爾