英國《每日郵報》報道，8支喺英超排名前10球隊，正聯手尋求禁止曼城（藍衫）參加來季嘅歐聯賽事。因為被指違反財政公平規則，俾歐洲足協禁止參加歐洲賽事兩年嘅英超球會曼城，早前就判罰向國際體育仲裁法庭（CAS）提出上訴，但受到武肺影響，原本漫長嘅法律程序勢將再被拖延，令藍月亮有可能會趁上訴期間，繼續參加歐聯賽事。不過包括利物浦、曼聯、車路士、熱刺及李斯特城等八支球隊，已準備聯手委託律師事務所，向CAS提出申請，即時禁止曼城參加來季歐聯賽事。對於各隊嘅行動，曼城未有作出回應，而該隊內部深明各隊有意為難，所以唔會作出任何評論。另外，曼城翼鋒史達寧喺ig同一眾網民進行問與答，呢位25歲英格蘭國腳就提到自己深愛紅軍，唔排除會喺未來重返喎。