呢排甚少坐的士，不過呢輪交通多數唔擠塞（過紅隧除外），碰到要趕時間，好容易搵到的士。呢日坐的士去圓方，司機一開車就發表偉論，滔滔不絕「擾人清夢」（按：左丁山坐的士例牌閉眼瞌眼瞓），唯有答番一兩句，後來聽到佢講：「2020年畢業班大學生抵死咯，抵佢哋依家搵唔到工。」哦，有藍絲意味，更加免開口任佢噏。
後來遇到一位中學校長L，問佢：「今年搵工確係好難，大學生唔夠運碰上經濟不景，係難搵工㗎嘞！中學生又如何呢？」校長L話：「中六生邊會掛住搵工吖，考好DSE先至算，人人都想入大學，考唔到先至諗其他。」但今個學年下學期停課已久，學生考DSE咪大打折扣，點知校長L話：「唔使驚。我校每年一月已為中六生考晒試，二三月係用來溫習，操試卷嘅，故此，如果學生在家努力溫習，停課對佢哋考試冇影響。」哦！原來中四至中六課程，五個學期讀完，第六個學期係用嚟考試考試考試嘅。此乃香港Band1學校特色，但係咁，中四中五學生咪少咗一個學期聽書，點好？校長L話：「唔怕，用Zoom實時教學，好流行，最緊要提早教完課程範圍，然後操操操，操考試也。」
唔怪得有家長要子女讀IB，可以擴闊思想範圍喎，不過有大學理工科教授話畀左丁山聽，一啲IB學生入到本地大學，數理科基本功唔夠紮實，勝在更有想像力、好奇心，而DSE學生就夠實在，但有時思想直線型，冇乜out of box思維。呢位教授嘅個人意見（唔同意唔好鬧）係：IB生讀文科商科法律醒啲，DSE學生就在理科工科好啲。
虎媽A為咗兒子讀IB好還是讀DSE好，糾纏經年，卒之在去年聖誕節定咗去加拿大英國視察寄宿學校，一於送子女出國！哎吔，好彩去得快送得遲，否則好似佢位藍絲朋友咁，去年大罵示威者，話香港廢青冇前途之後，立即要兒子退學送去英國，依家COVID-19肆虐又驚到鼻哥窿冇肉，貴價買機票帶兒子回港，一來一回唔見錢及時間外，兼嚇咗一餐。虎媽A卒之決定今年九月送子往英國，因為兩夫婦在加拿大實地所見，學校好輕鬆，carefree得滯，唔似英國寄宿學校咁有規矩。送子女去英國寄宿學校，銀紙先行，現在英鎊大跌，正好買番啲作儲備。冇錢又點，咪乖乖地留在香港囉。小學校監Y對左丁山呻：「用Zoom實時教學喎，教鬼咩，我間學校嘅學生多數係來自基層，冇閒錢買iPad或買多一部電腦呀。香港唔止人係貧富懸殊，學校都係貧富懸殊。」校監Y可算唔話得，自掏腰包買幾千個口罩準備畀學生復課之用，功德無量。