現年59歲的韓毓霞是無綫體育新聞殿堂級主持，主持《體育世界》34年，深入民心。不過，自無綫體育組前年解散後，她慘被投閒置散，即使被安排拍劇也只是擔演「茄喱啡」，大材小用，令她萌生離意。韓毓霞最終決定今個月約滿後不再續約，跟無綫結束36年賓主情，談到離巢心情，韓毓霞昨受訪時坦言：「冇乜唔捨得、冇乜留戀。」
韓毓霞自1984年加盟無綫主力主持《體育世界》，多年來先後採訪過7次奧運，是香港體育新聞的殿堂級主持，可惜隨住無綫前年解散體育組，她也慘被投閒置散，《蘋果》收到消息指因韓毓霞過去大半年零工作，令她心灰意冷決定離開。韓毓霞昨日接受《蘋果》電話訪問，直認本月跟無綫約滿後不再續約，正式結束36年賓主關係，是繼劉江、敖嘉年和古明華後，又一資深藝人離開。問到離開會否不捨？韓毓霞稱：「其實唔捨得係當年嗰班工作人員一齊做嘢嗰種精神，唔係唔捨得間公司，因為此一時彼一時，𠵱家成個氣氛、見到嘅人，同埋佢哋做嘢成個system係完全兩回事，所以冇乜唔捨得、冇乜留戀㗎啦，有團結精神班同事都走晒！」
拒續約好平靜
據了解，體育組解散後，韓毓霞僅獲安排客串演出《BB來了》及兩集處境劇《愛．回家之開心速遞》。問到過去大半年是否不獲安排工作，她無奈說：「唔係唔畀，咁冇體育吖嘛，咁畀乜呀？」雖然有安排拍劇，但韓毓霞坦言不想接。談到決定不續約，她表示：「好和平、好平靜，我都冇返到去公司，我喺電話覆佢（藝員科），佢問我簽唔簽，後尾佢催我，我初初未諗掂，我話畀多個月我啦，過咗一個禮拜佢再打畀我話：『其實你都心中有數㗎啦！』咁我話如果你要快，我答案就係唔簽。」
至於是否被要求簽一個騷的合約？韓毓霞笑說：「我唔記得，我哋啲做咗咁耐，就算每一次簽約加你5%、10%，積積埋埋都好襟計，咁你簽我去做一啲唔係話真係好孭飛，好多時我只可以做一啲好點綴性嘅角色，喺公司嘅立場嚟講，佢都好浪費，有時佢哋call我一、兩次返去做嘅角色，我心諗：『你真係嘥公司錢。』」
韓毓霞指並非覺得自己矜貴：「我會覺得：『你個劇係咪有咁多budget？』我都唔好意思。我𠵱家係小小紅色頭髮，有個角色做60年代掌櫃，個頭噴黑油都噴咗成粒鐘，好似拍咗45分鐘，真係好賺，但問題我都覺得唔係好妥當，你搵個黑頭髮嘅人做咪得，唔使搵我。我都唔係做呢瓣出身，我做開體育㗎嘛，如果你話有奧運做，我就唔會乜嘢啦，𠵱家東京奧運都唔搞，咁邊有得做啫？咁咪算囉！」
退休享受人生
前年解散整個體育組，是否對公司心淡？韓毓霞謂：「咁我又唔會用心淡呢兩個字喎，我覺得係大勢所趨，內地資本雄厚，以香港一間咁local嘅電視台嚟講，你要同內地資本去fight，真係冇得fight。如果自己做老闆睇到勢色唔對，好似李嘉誠咁，我唔做塑膠花改做地產，但你打工冇得咁，我覺得鍾志光好叻仔，轉型成功。」是否轉行？韓毓霞表示暫時決定是退休享受人生，她透露曾有朋友叫她一同搞移民公司，但現全球都被武漢肺炎肆虐，故待疫情過去才再考慮。
採訪：魯吉