效力中超上海上港嘅巴西前鋒侯克，上年12月承認搭上前妻嘅外甥女卡美娜，最近仲喺社交媒體標示自己「已婚」，有報道話兩位今次閃婚係為咗可以有結婚證書，搞簽證留喺中國陪侯克，但最近武漢肺炎喺全球爆發，唔通卡美娜真係信政府，唔驚？真係認為中國政府「可防可控」？
侯克仔女叫表姐定阿媽？
33歲嘅侯克舊年7月同前妻伊蘭結束12年婚姻後，火速同伊蘭嘅外甥女卡美娜撻着，關係真亂。不過候克就覺得呢段關係唔使遮遮掩掩，之前已經同卡美娜嘅父母，即係前妻嘅家姐，同埋卡美娜嘅哥哥一齊三口六面講清楚件事。
之前侯克仲未離婚嗰陣，同卡美娜嘅關係已經特別好，仲經常三人行一齊出去玩同行街。雖然卡美娜覺得自己好對唔住阿姨，仲特登寫咗封信同伊蘭道歉，講明自己同侯克係離婚後先一齊，自己並唔係第三者，懇求伊蘭嘅原諒。當時伊蘭透過律師發表聲明，指自己對於結束12年嘅婚姻非常難過，並且唔認同侯克將佢同卡美娜家陣嘅關係公開，因為咁樣會影響到其他屋企人。
隨住兩人公開戀情，都懶理世人目光，卡美娜經常上載兩人嘅甜蜜合照。最近，有報道指兩人已經拉埋天窗，仲話兩人已經戴上婚戒，侯克仲喺自己嘅社交媒體標示自己「已婚」。不過，相信兩位要同侯克嘅三位仔女搞清楚啲親戚關係先，結婚後卡美娜由佢哋嘅表姐變做媽媽，卡美娜嘅媽媽就由大姨媽變做婆婆，到時唔小心叫錯都唔知點算。
結婚換簽證長留中國
據知兩人今次閃婚並唔係單純愛情咁簡單，係侯克希望卡美娜可以長居中國陪伴自己，咁女方就需要結婚證書先可以辦理簽證長期留喺中國。不過，武漢肺炎喺中國同世界各地爆發嘅情況下，卡美娜都選擇為咗侯克去中國定居，睇嚟兩位真係真心相愛。定係最近武漢肺炎疫情開始喺歐美爆發，唔通佢哋真係相信中國政府已經控制疫情，認為目前中國先係最安全嘅地方？