原本利物浦只要再贏兩場，包括擊敗愛華頓同上周六主場搞掂水晶宮，就可以成為英超冠軍，不過由於武漢肺炎疫情肆虐英超停擺，英政府仲下令封鎖公共場所，令晏菲路球場附近嘅商店幾乎全部閂晒。有麵包店老細話冇咗波踢好大鑊，據報佢哋原本可以日賣多達700份餡餅，但家陣好難撈，而利記球場內，據報只得六個保安返工，球員要按計劃喺屋企操，有利迷仲特登去到晏菲路，感受吓原定封王嘅喜悅，仲有利迷拉定橫額準備定同紅軍慶祝（圖）。其中一對原本住喺美國紐約、馬來西亞籍嘅紅軍球迷，就着咗紅軍波衫喺晏菲路場外表示：「我老竇一月離開咗人世，我哋本身計劃嚟代佢睇利物浦對水晶宮場波，又好好彩買到飛。比賽取消咗，我哋嘅波飛雖然有得退，但酒店就冇喇。」