【「蘋果尊訪」系列最終回】今日來到鄧兆尊連載專訪最終回，四兄弟妹在父親新馬師曾（鄧永祥）和母親洪金梅耳濡目染下，都喜歡寵物，有養貓和狗。兆尊養了貓狗共10隻、小艾獨養16隻狗，兆榮僅養1隻狗，最細的碧玉最厲害，一個700呎單位，共養了26隻貓，進入她家大廳時，發現到處都是貓，而且貓咪被她軍訓式訓練，教得很乖，吃飯會一個個排隊等，十分聽話。
撰文：鍾國仁
攝影：沈健程
小艾養了16隻狗，她謂沒有怎樣訓練狗狗，問她為何只養狗？她說：「以前有養貓，但全部過身之後就只剩狗，咁咪索性全部養狗囉！阿媽有兩隻細狗原本喺元朗住，但阿媽走咗之後，成日俾另外兩隻大狗蝦，咁我咪攞返嚟永祥養。原本跟我住，但阿媽兩隻狗又同我原本啲狗唔夾，我畀咗阿哥養。」
聽號令集體行動
問到小艾養這麼多狗，會否吵到鄰居？她說：「佢哋唔係好嘈咋！我出去返到入門佢哋會興奮嗌一下，然後就會平靜落嚟，大部份都係細狗仔，係比較乖。我大部份狗都係收養返嚟，有時喺街見到可憐嘅流浪狗，我都會收養，收吓收吓，屋企都唔夠地方畀佢哋活動，我都唔敢再接收返嚟！阿妹就主要養貓，如果見到可憐流浪貓，我會交畀阿妹養，佢對貓超有愛心，養咗26隻，每個月同貓冲一次涼，但佢幾乎日日都要幫貓冲涼咁滯，佢教貓好有耐性，所以佢啲貓，隻隻都好有紀律，好似軍人咁，好集體行動，完全聽我妹號令，我都唔知佢點解咁厲害，連貓都可以教到咁聽話。」
識風水又學中醫
而兆尊貓狗都喜歡，所以家裏一直以來都有養寵物，去年底他家的貓貓又生了幾隻貓仔出來，十分之可愛。兆尊表示：「嗰日隻貓要生時，我都係叫碧玉來幫忙接生，佢屋企啲貓生仔都係佢搞掂㗎，唔知佢點解識同貓接生咁叻嘅。」兆尊還佩服碧玉一個人與20幾隻貓一齊住，一樣井井有條，一方面又在學習中醫和命相，碧玉有自己的世界，不太理會人家的事情，兆尊說：「佢得閒會搵我哋做吓白老鼠，幫我哋睇吓命相、風水，有乜頭暈身㷫都會叫佢睇吓，佢都學得唔錯，遲啲應該可以去考埋個中醫牌返嚟。」