喺武漢肺炎疫情下，體壇各大賽事包括歐洲五大聯賽完全停擺，西甲賽會同西足總周一發表聯合聲明，話所有國內比賽無限期暫停，冇重開時間表。不過西甲上星期就搞咗個「電競版西甲」，由各隊西甲球隊派球員做代表打足球電玩《FIFA 20》，結果皇家馬德里嘅馬高阿辛斯奧就贏咗冠軍，成為西甲FIFA球王。
西甲停擺，唔少球員都趁機客串做電競KOL，貝迪斯嘅保查艾利斯同西維爾嘅利古朗早前就喺網上直播打《FIFA》，仲吸引咗六萬位球迷收睇，隨時仲多過現實比賽嘅入場人數。結果西班牙一個電競活動主辦單位就醒喇，舉辦咗今次為期三日嘅比賽。
連入兩球贏雷加利斯
今次比賽嘅原意本來係想搵西甲20支球隊各派1位球員做代表出賽嘅，不過由於巴塞隆拿同埋馬略卡兩支球隊嘅贊助商係Konami，即係另一款足球遊戲《PES》系列嘅開發商，所以原本有參賽嘅巴塞後衞沙治羅拔圖都惟有臨時退賽；馬略卡就直情冇派球員參加㖭。
西甲冇巴塞邊個最開心？梗係皇馬！今次嘅比賽亦都一樣，皇馬嘅前鋒阿辛斯奧睇嚟喺養傷期間有苦練《FIFA》，喺比賽入面接連擊敗CF格蘭納達嘅荷西馬天尼斯、維拉利爾嘅文奴摩蘭尼斯同伊巴嘅伊度艾斯普薛圖殺入決賽，同雷加利斯嘅艾達雷布爭冠。
喺星期日嘅決賽入面，阿辛斯奧繼續手風大順，上半場就靠佢喺遊戲入面嘅自己同夏薩特各建一功領先，換邊初段再由莫迪歷錦上添花射成3:0。雖然艾達雷布之後連追兩球，不過阿辛斯奧喺完場前再憑自己射入一球，結果以4:2贏得今次「電競西甲」嘅冠軍。
電競F1中國車手威水
雖然阿辛斯奧今次贏咗冠軍係冇獎金，不過就為聯合國國際兒童基金會籌到超過14萬歐元善款，用作對抗武漢肺炎嘅工作上，而且今次決賽直播仲吸引咗17萬人收睇，阿辛斯奧第時唔踢波，都可以考慮吓轉行做電競KOL喎！
除咗西甲，家陣暫停緊嘅F1亦都搞咗個「電競版巴林站」賽事，一班車手玩《F1 2019》鬥法。不過參賽陣容就冇西甲咁星光熠熠，較為人熟識嘅得麥拿侖嘅諾里斯，同埋上季為雷諾出賽嘅侯根保箒，不過都吸引咗接近34萬人收睇比賽。今次比賽結果都算爆出咗個大冷門，由雷諾嘅中國籍試車手周冠宇贏得冠軍，唔知呢位20歲後生仔會唔會因為今次比賽而上位，下年可以升上正式車手席位呢？