今屆立法會選民登記剩返個零月時間，更改地方選區同功能界別選民資料仲要喺下個月2號就截止，民主派要力爭9月立會選舉搶攻過半數議席，就梗係要喺最後階段力谷。民主動力噚日發起選民登記行動，今次計劃同區議員合作，由佢哋請人落區幫手做選民登記，民動今次仲獲資深傳媒人蕭若元贊助75萬。今次蕭生肯出錢幫民動梗係好，但有網民有少少擔心，因蕭生一向有「燈神」之稱，唔知有冇影響？有網民就希望「燒山」今次可破燈！
資助區議員請人
民主動力召集人趙家賢話，民動今次會向150名參與計劃嘅區議員資助約4,800蚊聘請人手，令區議員能夠派專人到各區協助選民登記，又可以一併搶攻功能界別議席，如果區議員熟悉地區情況，就可以搵區內嘅黃店幫手做埋飲食業界登記，民動亦會向各區民主派區議員提供物資支援，好似提供含有選民登記資料嘅易拉架咁，又會邀請唔同專業界別議員同工會落區支援。民主派會議召集人、公民黨陳淑莊提醒獲資助嘅議員，有關資助可能要申報。
李八方
今次有蕭生出錢、民主派出力梗係好，但亦有網民憂心，蕭生一向有燈神之稱，而且燈力驚人，連國際大事俾佢燈到，今次資助選民登記會唔會又燈呢？但亦有網民話，蕭生今次冇出聲，只係出錢，應該冇事嘅！又有網民話蕭生以前試過燈力失效，希望今次佢可以破燈！
李八方