【黑鏡線索】
自己公司實行遙距工作兩年，補充一下幾點觀察：
1.一直講「遙距」（work remotely）而唔係「在家工作」（work from home），係因為呢兩樣嘢，好似一樣，但其實有重要分別。「遙距」唔一定喺屋企，例如你屋企有兩個唔使返學嘅小朋友每三分鐘就搞鬼你，或者你同阿媽住而佢當你喺屋企唔使做，每隔一陣叫你買嘢執嘢搵嘢，咁遙距隨時仲衰過返公司。
2.一係就全遙距，一係就完全唔遙距，兩溝好難搞，最好唔好。因為，遙距做得好嘅先決條件，係大家一齊用指定嘅網上渠道溝通，例如我地日常用Basecamp，刻喺石頭上嘅嘢就用Github。如果有啲人返工司做，佢哋自然就用返面對面嘅方法溝通，咁就冇人知究竟以上嘅source of truth渠道漏咗啲乜嘢，咁遙距嘅同事就會形住自己成為核心嘅外圍，於是公司就分成為內圍同外圍，影響士氣。有做過海外衞星分部嘅人，應該明白呢種感覺。
3.個含意係，好不幸，遙距好難分批試，一係唔做，做就要all in。
4.唔係人人適應得到遙距。例如有啲人，非常需要社交，鍾意每日同同事見面，佢哋明顯唔會頂得順遙距。
5.又例如，上次講過，遙距嘅精髓係async，所以溝通渠道，通常會由話音變寫字，而呢個係當中一個遙距嘅好處，因為文字比起話音更容易儲存同搜尋，換句話講，公司內部資訊，會記錄得齊好多。口述歷史有幾大鑊，相信所有試過接上家手尾，或者上司同事講過啲乜嘢唔記得晒嘅受害者，都會明白。問題係，我之前都唔覺，原來有唔少人，非常抗拒打字，遙控對佢哋，都係行唔通。
6.所以話，一間公司，要由非遙距變遙距，非常艱難，最起碼，有以上類別嘅同事會唔撈，而唔試過，係好難估到幾多得幾多唔得。
7.即係話，成功遙距嘅公司，絕大部份，係day 1就遙距。於是，所有運作，由請人到溝通到project management，成件事嘅基礎，都係with remote in mind，咁（廢話）成功幾會就高好多。
8.自己公司，兩年前轉全遙距，點解又轉得？因為，兩年前，公司谷底，基本上由頭reset過，留低嘅同事得五分一，同重新嚟過冇乜分別。橫掂不嬲都有諗過遙距，嗰次索性轉埋。
9.公司全遙距，所有人以兩個禮拜為一個單位，劃定嚟緊嘅目標。Basecamp每日會提同事，每朝喺網上用五分鐘答四條問題check in。大家同意幾時用乜嘢溝通方法，唔會乜都用特急。唔少人唔鍾意喺屋企做嘢，包括我，咁就公司出錢，租自己鍾意嘅co-work space。喺香港嘅同事，每季都會一齊出嚟見面。基本上就係咁。
10.既然唔再以公司方圓距離作為請人嘅filter，有啲以前好難請人嘅位，而家容易咗。
11.Before and after分別好大，行咗remote，唔會返到轉頭㗎喇。
撰文：宋漢生
fb : sunghsblog