早於本月三日喺杜拜集訓、原定備戰月中嘅世盃外嘅中國隊，由於武肺不斷擴散搞到世盃外要延期。內媒話，早於3月3日遠赴杜拜集訓嘅國足，因世盃外3月9日宣佈取消，結果原定上周五回國，而返國前原本安排3月14同19日，分別約戰重慶當代及深圳佳兆業兩支球隊，返國後嘅周二再約戰廣州富力，不過武肺迅速發展，結果令李鐵（圖）教嘅國足所有熱身賽都要取消，更一度滯留杜拜。早前內地網絡仲傳出國足希望國家幫手盡快返去，甚至有傳國足因北京方面拒絕落機而要繼續滯留，結果要由足協闢謠。好在南方航空決定為國足，增開一班從杜拜返去嘅航班，據報周日晚啟程，周一朝10點半左右落機，仲預告全隊要隔離14日。