張智霖（Chilam）噚日喺銅鑼灣出席保良局捐贈口罩活動，係佢上個月同成龍、曾志偉仲有譚詠麟等出席「撐警無罩宴」後，首次現身，同場Chilam獲委任為保良親善大使，今次係佢第二次做保良大使，佢話希望能夠幫助老中青不同嘅年齡層，又話已訂購四萬口罩，捐贈有需要人士：「我係會一路去做，直至疫情完結。」
囝囝知乜事
警星餐敍後被網民瘋狂洗版，問Chilam心情有冇受到影響？佢話：「冇嘅……都係……都唔識講。」太太袁詠儀（靚靚）被洗版式狂轟，係咪感到不快？佢話：「唔回應嘞，事件過咗去，大家向前看，希望香港大家一條心去抗疫，呢個係比任何事情更重要。」問到飯局照片中各人都冇戴口罩，佢話：「可能係食飯（冇戴），食完飯都戴返，不過防疫意識係冇咁敏感，都係啱嘅。」Chilam又透露囝囝魔童都知道發生乜事，都冇覺得不快。
至於任保良大使，係咪希望洗底？Chilam話：「其實係機緣巧合下做大使，自己亦冇任何計劃會去做啲乜嘢。」另外，武漢肺炎疫情嚴峻，Chilam透露早前一家到布吉曬太陽，現時盡量留喺屋企避炎。
撰文：馮仁昭