日前碰到上海總會會長李德麟,問會長:「餐廳生意如何?」李會長答:「梗係唔好啦!晚上冷清清,中午有五成客已經算係唔錯。我知吖,你取消咗3月20日晚上兩圍吖嘛!」冇法啦,兩圍枱二十幾人聚集,政府都唔鼓勵,依家直情考慮所有餐飲場所關門方案㖭。上海總會會所餐飲生意大不如前,並非新聞。左丁山聽朋友講有一啲私人餐飲會所已經減薪,叫員工放無薪假期,於是問李會長會唔會仿效?李會長話:「我都知有其他會所減薪,放無薪假,但我哋決定繼續頂落去,不減薪,不放無薪假,頂得幾耐得幾耐,學政府話齋,直至另行通告為止。我哋管餐廳嘅小組委員會仲係每星期開會一次,不停咁檢討餐廳衞生環境及食物質素㗎!」
今年一月之時,冇人估到疫情影響如此之大,兩個零月啫,本已逐漸復甦之餐飲業如在十號颱風山竹過後,被吹到七零八落,餐廳執得就執,最強勢之茶餐廳翠華威靈頓街分店,屹立22年後都話要停業,令中環人驚詫。呢間翠華日日爆滿,早餐午餐下午茶晚餐宵夜都高朋滿座,冇咗佢,蘭桂坊酒客若有所失,因為不少洋人在蘭桂坊只係飲酒食花生,填肚就在翠華也。呢間翠華,聞名國際,一啲外國遊客,尤其是東南亞豪客夜晚入住置地文華東方之後,不時會到翠華食碗魚蛋河粉嘅啫。失去威靈頓街翠華,中環算係冇咗一種情調。
不過講真,翠華上市後,價錢貴咗,食物味道似乎遜色咗,比較令人失望。逢係餐飲股上市,左丁山都被老友問到,每次都例牌「潑冷水」。三十年來,在港交所掛牌之食肆股,通常係表現不理想嘅。有咁多股票選擇,何必買食肆股?
因堂食不景,酒店餐廳紛紛推出外賣,皇朝會咖啡室食物素來好好,但左丁山已有幾個月冇去過。最近收到皇朝會電郵,歡迎外賣,又推出不同形式之保健抗疫湯,真係難為咗管理人。然後又收到中環名店China Tang(唐人館)通知有外賣服務,但要自取。China Tang有一款招牌盆菜,有鮑魚、鮮蝦、帶子、鮮魚、豆腐等等,非常好味道,人人吃過都讚好,尤其是瓦煲內之豆腐,美味異常。呢個盆菜賣1088元,性價比不俗,但外賣自取嘅話,呢煲嘢好重啫,如果有送貨就冇得彈。餐飲M話港島名店搞外賣,最好同一啲電單車送貨公司合作,能夠送上門就最方便,在中環自取外賣,女強人未必拎得起,男經理挽到手軟,請各店主諗諗如何辦好delivery!