武漢肺炎社區爆發，過去幾日感染人數暴增，民間抗疫資源顯得更加重要，但灣仔區議會主席楊雪盈日前就喺社交網站爆料，話灣仔民政事務助理專員以區議會印製嘅防疫包小冊子上部份資料唔準確為由，包括用「武漢肺炎」而唔係世衞嘅「2019冠狀病毒病」，要求停派防疫包，不過另一灣仔區議員梁柏堅就一於少理，實行「抗命」照派畀街坊。
大彿口選區嘅梁柏堅話，佢喺秀華坊仲裝修緊嘅議辦對出大廈啱啱出現確診個案，佢又同時收到呢批防疫包，所以懶理民政事務署「建議」，主動派畀涉事大廈街坊，八方問佢驚唔驚資訊引起街坊「誤會」，佢話喺抗疫重要關頭，街坊有物資重要過其他考慮。
據知「唔準確」嘅資料除咗武漢肺炎，仲涉及兩樣資訊，包括區會抗疫撥款修訂咗，以及會喺區內裝消毒裝置但其實未有定案。