玩在瘟疫蔓延時，老人家與幼童並沒兩樣，信義會王賽明快樂家庭培育中心針對幼稚園至初小學生，用facebook live每周上兩堂，每堂半小時，又玩又學。這天社工們比賽爭勝，六歲孖女與媽媽爭相高叫所支持的社工名字，很有馬場風味。
課後記者問孖女喜歡疫情下的悠長假期還是上學，大孖Bella答：「兩樣都鍾意。」話音未落妹妹Anna打了個噴嚏，似有所指，她說：「（鍾意）𠵱家喺屋企多啲，有得同阿姐一齊坐！」原來二人同班不同坐。再問Anna在這網上課堂學到甚麼，她說：「要開心啲，唔好成日唔開心！」也說得是，疫情下太多愁雲慘霧。
社工霍芳婷表示，很多家長認為停課最難捱是一家人困獸鬥，「本身返咗學有個空間，大家可以唞唞氣，突然因為停課，長時間留喺屋企，大家壓迫感好大，磨擦好多。」這就是網上課堂的由來，「唔通畀部手機佢（子女）長睇到4月20號？又唔得，於是成班同事諗，不如玩互動遊戲。」原本打算每堂讓家長喘息半句鐘，未料看得最開心卻是大人。
孖女母親冼太是全職媽媽，她訴說疫情首兩周全家緊張，不敢出外，結果「炒埋一碟」，之後放輕鬆了，又有了口罩，一家出外做運動，但始終整個宇宙只有四個人，她承認：「每日生活唔係你就係我，老實講有啲枯燥。」一天看見中心有直播，也看見曙光，「我原本諗住掉低佢哋自己睇，好似霍姑娘咁講，點知自己睇埋一份，都好開心。因為成個假期唔係我諗嘢出嚟玩，就係佢哋諗嘢出嚟玩，突然有個人幫我諗遊戲，有人做咗主導。」
病毒蔓延全球，好媽媽看得多麼正面，「平時佢哋返咗學，我有自己私人嘅事，但基本上𠵱家唔係自己cancel就係被cancel，既然cancel晒，不如全心全意陪佢哋，珍惜呢段時間。我相信人生唔會成日有呢啲事情發生，我覺得係天災，如果全心付出咗，大家平安無事，就係經歷、回憶；就算有事，我全心全意付出咗，唔會有遺憾」。孖女說現在跟媽媽關係更好，「因為可以虐待媽媽！」