前星期中大大師兄森哥來電約吃午飯，有時間當然要應承，佢又搵兩位聯合書院師弟鐘錶L與製衣Y一齊，於是最方便就係走去上海總會。
上到去，訂位小姐問：「3月20日訂咗兩圍晚餐，會唔會取消？」過去都係問會員駛唔駛寫菜嘅啫，點解會問要唔要取消？立即醒起，校友會搵到李明逵帶隊遊中環大館之後到上海總會吃餐一事，校友會已經取消咗，左丁山亦要相應取消上海總會晚餐，於是立即向訂位小姐講：「乜你咁醒目嘅？我真係要取消喎。」小姐苦笑：「近月會員打電話嚟，取消訂位多過確認呀，所以我咪問你會唔會取消囉。」
如今晚飯生意真難做，「聚集性」活動好難搞，校友會主席Y話上次電郵一出，校友知道係李明逵帶隊兼有上海總會一餐，收費五百，立即報名，兩小時內滿額，但萬萬估唔到，去年因示威活動取消，今年又因疫情不止而取消，第二度延期，真係人算不如天算。
講到呢樣，森哥話：「我閉關一個月，今日復出，深悟人生無常，八十幾歲人我以為乜都見過，竟然會碰到前所未見嘅病毒，全世界大亂。幾個月前難得遇上一位富翁肯捐錢幾百萬畀學校，講好晒詳情後，點知冇咗音訊，原來捐款人，五十幾歲，突然中風，不復記憶任何事，令人唏噓。今日有好嘢食，大家輕鬆吓，對任何事情不必太緊張！」
森哥閉關復出，神彩飛揚，令人見而欽羨。上海總會正常時期坐滿食客，耆英多的是，七十歲算是小伙子。記得某一年上海總會為邵逸夫爵士慶祝百歲壽辰，左丁山叨陪末席，眾人叫左丁山為「小左」！令左丁山想起還有中英聯絡小組時，香港記者到北京採訪，柯大使請喝茶，叫「小張」為香港記者斟茶一事。年近六十嘅記者都記得小張便是後來之中聯辦主任。問製衣Y與鐘錶L：「你地工廠復工未？」兩人答：「復咗六七成啦，但依家受疫情影響，冇單嘅死，接單又死，因為供應鏈斷咗，材料零件唔夠，接到單都不能準時交貨，有啲巴西訂單要求部份貨款以巴西Real（雷亞爾）找數，美元太強喎，我地當然唔肯！」收新興國家貨幣當然唔好制，目前美元強勢，新興貨幣不斷貶值，收嘅話，到出貨時利潤都會蝕埋。兩位師弟好彩已經上咗岸，蝕埋今年就退休嘅話，仍然生活豐裕，用多啲時間為校友會學校出力好過。製衣L話不少富貴學校現時用Zoom上課，但佢做校監嗰間係平民屋邨小學，一班基層學生有寬頻已算好，家長點識安排用Zoom為小學生上課吖！講到教育數碼化，教科書電子化，教育局雙眼只睇麥當奴道學校為標準，忘記咗半山區與公屋區有雲泥之別也。