立法會選舉雖然9月先舉行，但民主、建制陣營都開始有動作，特別係建制派，因為區選大敗之後，建制不容再失，西環更要力阻泛民爭立會35席，喺呢個咁危急情況下，建制陣營梗係要精銳盡出，但令好多政界、民主派、甚至建制中人估佢唔到嘅係，原來建制嘅「精銳」、「大殺傷力武器」之一，競然係搵兩個前特首董建華同梁振英帶頭幫建制助選！難怪有政界中人睇到頴晒頭，「究竟係幫邊一邊助選？」
話說《香港01》噚日報道，話全國政協副主席董建華同梁振英正牽頭組成大聯盟，用修復社會撕裂為主軸，想協助建制派打好9月選戰，而且呢個聯盟仲雲集政商界重量級人士，又有全國政協常委、人大代表同地產界「大孖沙」，仲話最快下星期公佈詳情，一於總動員幫建制打地區工作同輿論宣傳。
建制派：唔好去我個區
好多政界、民主派、甚至建制派睇完不禁倒抽一口涼氣，一個老董已經不得了，再加個689，一陣仲有成班港區人大政協，真係國家級助選團隊呀！有民主派人士話，單係諗起老董、689落區，逐一同建制派候選人講支持佢哋同拉票，已經笑出嚟，「諗起689話支持佢就要支持某建制候選人，真係想笑」，又有政界人士唔明呢個聯盟「究竟係幫民主派定建制派拉票？」佢聽聞有建制派睇完都覺得，如果搞壇咁野「最好就唔好去佢個區」，因為除咗民主派唔妥689，好多中間淺藍都好憎佢，「冇理由將拉票變趕票」。
李八方