前特首曾蔭權因為公職人員行為失當罪刑滿獲釋及上訴得直後，上年7月曾公開露面分享獄中感受，最近佢接受一個由天主教徒成立嘅慈善機構「生命恩泉」訪問。煲呔喺堅尼地道前任行政長官辦公室受訪，入面除咗擺咗唔少家庭舊相，亦掛咗一幅來自瑪竇福音嘅「非以役人乃役於人」八個大字。
天主教香港教區主教陳日君喺2005年平安夜，送咗一隻由已故教宗若望保祿二世所贈嘅「善牧」浮雕戒指畀煲呔，希望上主賜勇氣畀煲呔向中央爭取普選。當時煲呔被問點回應陳日君嘅期望，透過發言人表示「非以役人，乃役於人」，意思係自己唔係想要人服侍，而係要服務香港人。
煲呔喺訪問中，大部份時間都係講自己嘅信仰。佢透露獄中最慘之時感覺到同天主更加接近，接觸到好多宗教書籍，越睇越有興趣。佢特別多謝陳志明神父喺佢坐監時每星期都去探佢，令佢知道若果要接近天主同做人更開心，「一定要學做聖人」。