盧覓雪的人脈，不是講笑的。約她訪問定好了日期，她在電話中說笑：「我做埋你嗰份幫你借埋場地」，不消5分鐘，語音訊息傳來她已託圈中友人安排好地點，正好在她與海港城高層食完tea後，一落樓下即可訪問。快狠準，不囉嗦，是盧覓雪的作風。
她喜歡的，「幫你做埋」都仲得；她不喜歡的，「望你多眼」都費事。訪問當天，她被李力持狙擊，出po指「黃屍盧覓雪遺失電話同臭鬼性愛片流出……」5年前的舊聞，重點是，片中那人根本不是盧覓雪。最新發展是，杜汶澤代盧覓雪出律師信，要求李力持道歉兼賠償。
盧覓雪當日的facebook，與李力持竟然有13位共同朋友，手起刀落，她立即將那13個好友統統刪除。為了一個藍絲廢老，不惜連根拔，好友都冇情講，「我唔想同佢（李力持）有任何虛線連繫，虛線連繫都令我覺得太污濁！」
愛恨分明，盧覓雪就是這樣。
撰文：文嘉龍
攝影：沈健程
藍絲永遠唔Fact Check
面對被李力持的忽然「老屈」，舊料當新聞，盧覓雪說，藍絲的行為，正常人是想像不來的。她隨即PK鄧上身，「啲藍絲永遠都唔會fact check啦！我今朝寫咗個post，我𠵱家要PK鄧上身先，『有啲人呢好似係如獲至寶，好似發現一個天大嘅醜聞咁囉』，根本唔X係我呀，我X你XX，你識唔X識fact check呀！」火氣十足。
那條所謂性愛片，盧覓雪五年前早已澄清過，她今天由李力持說到陳冠希，「我當年一直都係戥陳冠希唔抵嘅人，我從來都唔肯睇佢啲片，我覺得做乜要侵犯人哋私隱，我覺得做人有自己一個底線，我嘅底線好清晰，我覺得我冇幸災樂禍過，我甚至乎寫文都去撐佢㗎！同樣地，我閂埋門做乜我嘅事，如果嗰條片真係如佢（李力持）所講，喺我個電話洩漏咗出去，呢個都係我嘅私隱！」更何況，片中那人只是人有相似。
與李力持完全不認識更沒半點私交，盧覓雪當然要劃清界線，但相反，盧覓雪身邊其實有不少藍絲朋友，「我大把藍絲朋友識咗幾十年，我唔會隨便同一個藍絲朋友去割席，當然我亦有好多黃絲朋友。你要搞清楚，即使佢係藍絲都好，佢唔好嚟干擾我，我唔好去騷擾佢，大家一樣係朋友。」
為了李力持，她把13個共同朋友都刪除了，當中有余安安和小美（郭富城經理人），「呢兩個我真係識咗幾十年，我由入行識到𠵱家嘅人，我都delete咗！唔緊要，我同佢哋私人係朋友，唔使喺facebook見嘅！」
未成為觀眾心中的「雪雪」、未出動「覓食」之前的盧覓雪，最早期是娛樂記者出身。她中學畢業後就應徵《香港周刊》做娛記，當年請她的上司是查小欣和李純恩。在報紙雜誌界打滾多年，盧覓雪與不少明星稔熟，章小蕙就是她多年的知心友。最近，曾與章小蕙相戀的商人陳曜旻（白頭陳）離世，當年哄動一時的娛樂名人新聞，今天，章小蕙和陳曜旻的名字，一般市民大眾可能早已淡忘，盧覓雪反而為人熟識。
每一步都摸着石頭過河
盧覓雪由娛記變成跨界傳媒人，想當年既是章小蕙閨密又是記者，有否心理掙扎過？「唔掙扎！一個記者同一個藝人嘅關係，係好虛偽！我畀咗一個江湖規矩畀自己，只要嗰樣嘢唔係佢講嘅，舉個例，章小蕙冇話畀我聽佢同邊個男仔拍拖㗎，我喺出面收到料都得㗎嘛，呢個係真事！吓，咁我寫唔寫好呢？喂，你記住邊個出糧畀我呀！」
那是一個明星名人娛樂圈社交界盛放的年代。當年從未接受過任何傳媒訪問的商人陳曜旻，為了不令戀情曝光，主動向周刊說項，交換條件是他的獨家訪問。往事如煙，盧覓雪是當時與兩位當事人最緊密接觸的人，「所謂嘅秘密，舉例我寫咗單嘢，傷害咗章小蕙、陳曜旻，我𠵱家好威水呀燒炮仗，我做呢單嘢幾勁呀！對我嚟講有乜咁勁，我再攞嚟翻炒冇必要，冇需要二次去揭露人家的秘密！我真心地覺得當日陳曜旻，佢𠵱家過咗身，我覺得一定要畀返個credit佢，我從來冇親口講過畀任何人聽，我衷心佩服佢，一個男人喺一個關係入面咁緊張，全香港睇住，佢都仲要去說項我哋，我夠膽講我係刁難到不得了嘅一個記者！佢願意付出咁大力去做呢件事，我點會唔去佩服佢呢！」
雖則口說記者和明星的關係很虛偽，但盧覓雪難得有不少真正交心的藝人朋友，「人嘅緣份好奇怪！一間公司，你有39個同事，你有38個都想佢死，偏偏你同呢個人唔知點解好似前世咁friend！我夠膽講，我冇利用價值，睇吓你同唔同我交往，我唔係呢本雜誌嘅副老總、我唔係採訪主任喎，你都願意同我交往，咁你咪真心同我交往囉！」
由記者做到雜誌高層，在2004年轉戰電台，輾轉十多年遊走不同界別，主持人電影網台電視劇都拍埋，大半生離不開傳媒，盧覓雪卻說，每一步都是摸着石頭過河，「有得設計有得諗就好啦，做唔掂已經轉咗行嗰啲人，你又問吓佢，你有冇諗過自己成世都係做緊二打六，永遠都做唔到一線小生呀？我想講，做人係冇得諗，紅梗㗎？唔好話紅，一定有job㗎？」
見步行步，人生難以估計，「當我做記者，任何一個記者好自然嘅諗法，應該向住總編輯望吖，逐步去囉，我想話畀你聽，我識得有啲人，佢一世都係做緊記者，一級都冇升過；有啲人做咗三年走咗，跟住做咗唔知乜大企業CEO㖭！冇得你諗呀我想講，都係見步行步，摸着石頭過河。金庸嚟香港嘅時候，一定冇諗過自己將來成就係咁大，金庸先生係我一個好respect嘅文化界前輩。冇一個人會預知，你諗嘅嘢係咪一定會發生？梗係唔係啦！」
娛樂圈應該係冇顏色
抗疫時代，盧覓雪說已經比較幸運，起碼每周都繼續和杜汶澤主持《喱騷》，還有和梁栢堅主持另一個網上訪談節目。說到黃色娛樂圈，她說：「娛樂圈應該係冇顏色。點解有咁嘅需要？舉個例，我作㗎咋，徐克咁優秀，嘿，佢藍嘅，我哋呢個黃色，我哋唔好用徐克；咁搵男主角啦，吓，古天樂，佢黃㗎喎，我哋啲藍片唔要黃，明明角色非古天樂莫屬，但係你有好多政治考慮，我覺得冇必要！」
自由的可貴，是隨心所欲。「李力持話我係黃屍，我同你講，我一次龍門冰室都冇去過，等如咩呢？等如我唔支持黃色經濟圈？我為咗要幫襯佢，我明明住喺筲箕灣（她當然又在舉例，盧覓雪本人住跑馬地）都要走去銅鑼灣先可以食，筲箕灣樓下唔好彩全部都係藍絲開嘅店，我咪好困惑？對我嚟講，生活唔係咁，生活就係隨心所欲，自由嘅可貴係，我今日想食龍門，我去龍門；我想見某啲人，我見到！呢種選擇的自由，我成日覺得任何自由都好可貴，如果硬要分呢啲嘢，我覺得好痛苦！」
活過半百，盧覓雪大她的老死吳君如一年、細過閨密章小蕙一年，今年5月就56歲的盧覓雪，雖則大情大性又愛恨分明，但近年要追求情緒上的平靜。「內心平靜囉，我嘅情緒咁寶貴！應該咁講，我一直以為自己都好舒適，心之所安，你個人覺得舒適咪舒適囉，睇你着眼點放喺邊，睇你點睇！」
與老外拍過拖，現在身邊未有另一半的盧覓雪，自從兩年前領養了兩隻貓回家（盧一虎、盧二虎），生活翻天覆地改變起來。「𠵱家我覺得好美好，因為我兩年前領養咗一對貓，生活真係天翻地覆改變！我冇同過任何人同居，更何況阿貓阿狗，忽然間你有兩隻貓，你要對佢負責任，溝通唔到你點同佢相處呢，呢個係好大學習，我學咗兩年！我自己冇諗過會領養貓，緣份囉，你唔好問我點解，開心到一個點係我每朝瞓醒都笑，養過貓先明！」
近九個月以來，盧覓雪說是有生以來講最多粗口的日子，當然與每個星期要和杜汶澤主持有關，有阿澤在，粗口難免，但更大原因，不說粗口，發洩不了。「我梗係熱愛香港啦，過去九個月痛苦到不堪啦，呢啲就係一段關係囉，我相信任何關係入面有高有低，你梗係想死啦，你梗係想鍊死你老公啦，但係終極，如果我真係唔愛佢嘅，我咪走囉；但係我愛，我好愛佢，咪繼續留囉！我二十幾年前都移過民（加拿大），但係我冇正式完成個移民，因為要去坐移民監，我冇坐呀！如果我真心咁恨移民，移咗，移ed呀！香港我真係唔會隨便肯走！」
愛恨香港，難分難解。
後記：前塵往事
盧覓雪在雜誌年代，她曾是記者的上司，記者多年間見識過她很多幕愛恨場面，至今都成為那些敍舊飯局的不死話題。如她試過大大力揼自己心口大哭喊冤，又試過為公事越講越激氣，即場將手機（Nokia！）砸落垃圾桶洩憤。
你做得好，她會讚得天上有，令你差點以為自己就是全世界最叻的記者；你做得差，她會罵成地底泥，又令你差點開始懷疑人生起來。盧覓雪的世界，沒有中間灰色的。她說：「今日傾返真係前塵往事！」
一些人一些事，好像變了，又好像不。記者由爬格子變成打鍵盤，盧覓雪踏破鐵鞋早已華麗轉身好幾回，不變的，如她說：「係人都知我係紅綠燈，擺晒喺塊面！」
場地提供：Amelia＠Harbour City
