歐洲球壇受到武漢肺炎疫情影響幾近停擺，除咗五大聯賽之外，就連俄羅斯同土耳其等地嘅聯賽都已經宣佈暫停，結果球迷嘅目光，竟然轉到啱啱開「咧」嘅白俄羅斯超級聯賽！雖然當地已有69宗確診個案，但白俄羅斯超級聯賽上周四照樣開「咧」，白俄足總仲發聲明，邀請球迷入場睇波㖭！
由於武漢肺炎喺歐洲擴散，歐洲球壇基本上已經停擺，但係位於波蘭同俄羅斯中間、擁有950萬人口嘅白俄羅斯，就唔認同鄰國關閉邊境同暫停公眾活動嘅做法，當地有官員甚至話：「我哋自身嘅恐慌比實際上嚴重得多」，甚至批評俄羅斯封關嘅決定。
同其他歐洲主要國家唔同，白俄超級聯賽係3月開始，到12月結束以避開寒冷嘅冬天，令到白俄羅斯足球成為當今球壇，僅有仲有比賽嘅賽事。喺周四揭幕戰，上季亞軍巴迪作客1:3不敵Energetik-BGU，據報呢場賽事吸引咗約730人入場；而上周五另外三場賽事，包括明思克戴拿模主場0:1不敵比斯特嘅賽事都如常進行。
白俄羅斯足總一份聲明指出：「雖然新球季出現咗令人不安嘅情況，但白俄羅斯超級聯賽仲會進行30輪比賽，我哋對此非常高興，仲會邀請球迷入場。」據報目前甚至有唔少電視台，對於轉播白俄羅斯聯賽深感興趣。