星期三早上有啲空檔，廣告阿姐話有事商量，於是走咗去沙田馬會「銀袋」食早餐。去到泊車，點解停車場咁多車嘅呢，幾乎泊滿晒，真係咁多人嚟食早餐？入到會所，例牌要測體溫，呢日又加多一項健康申報，要簽名及寫低會員號碼，相信係以防萬一有人出事確診，馬會可以立即追蹤。入𨋢有幾位老人家，原來全部係一樓出𨋢去gym嘅，馬會在會員周巧兒確診之後，樣樣特別小心，曾關閉健身室及泳池，依家開番咗，故此室內停車場幾乎滿座。入到銀袋，人客自然疏落，餐枱都好疏落，相熟侍應話：「減少咗近三分一餐枱，每張枱保持一定距離。」冇法啦，非常時期用非常手法嚟保持安全環境，午飯時分，會員在餐廳外排隊半小時等枱都冇得好講。
坐低叫中式港式美式早餐後，抬頭一望，老友記馬主F原來坐在角落與練馬師方嘉柏食緊早餐。走過去打招呼，馬主F伸出右手，彼此一握，方嘉柏立即搖頭：「No shaking hands!」然後拿出一樽酒精搓手液要我地搓手，想不到方嘉柏如此小心，佢自細在馬場長大，記得剛剛出道做練馬師時，馬主N介紹左丁山與佢相識，將隻團體馬擺入佢馬房，已經係好多年前嘅事咯，但大家在文華酒店Clipper Lounge飲下午茶一幕，記憶猶新。相識咁多年，不免單刀直入問佢：「你地一定係講緊打吡，馬主F隻馬有冇機會？」方嘉柏話：「全世界都知金鎗六十唔同卡士，上次贏千八咁輕鬆，呢次難搵對手啦，我地隻馬入到位置已經好歡喜。」咁又係嘅，金鎗六十係大熱門擂台躉，全港馬經貼士都以金鎗六十（第8場1號）為首選，臨場賠率可能低過2倍，但跑打吡真係打甩髀，隻隻馬都搏命，如金鎗六十有乜運氣際遇問題，其他馬可能有爆冷機會嘅。1999年郭彰國先生（Michael Kwee）嘅「聖利」都跑打吡爆巨型冷門近90倍啦。
次日出咗排位版，左丁山望清楚，跑打吡平磅評分最高者有着數，照計1號金鎗六十做膽，拖2至7號已經足夠啦，特別之處係一位馬主（黃凱汶）有兩匹馬上陣，其他馬主有一隻馬跑打吡，已覺榮幸，馬主黃竟然有兩匹，令人羨慕到極，呢兩匹（3號幸福笑容，6號幸福掌聲）會唔會與金鎗六十串Q呢？左丁山當然有私心，因為與2號勝得精彩馬主梁承達醫生夫人相識四十餘年（梁夫人係高美懿），7號時時有餘馬主范思浩係中大校董，11號馬主朱明雅係中大敬文書院始創人之一葉克勇嘅太太，都要捧場，諗咗一輪，呢場只買三重彩，1號做膽拖2，3，5，7，11。最可惜係今年打吡閉門作賽，左丁山不知是否入到場，未能落沙圈見老友，甚覺遺憾。