早一兩個月，中國人、香港人在日本狂掃口罩，掃到連日本人也買不到，極愛日本文化常去旅行的香港人看到，應該對這個「鄉下」有點不好意思。現居日本的Joe和Noel兩夫婦，不搶口罩反而派口罩，更親身製作布口罩，希望影響更多身邊的人，「日本人抗疫太佛系，政府又為咗奧運唔全力抗疫，反而香港就係民間抗疫嘅成功例子，所以希望盡做，幫到日本人朋友幾多得幾多。」
「香港人有沙士嘅教訓，今次好早就做好準備。」去日本留學的Joe和Noel，一月時已經戴口罩返學，「老師問我哋係咪唔舒服，我哋解釋武漢肺炎疫情嚴重性畀佢哋聽，佢哋反而覺得我哋帶嚟恐慌。」
記者因為參加了上月舉行的京都馬拉松而在facebook專頁「馬拉松看世界」 認識 Joe，得悉他開設了「港日連結抗疫行動」 專頁，記錄在日本和當地人一同抗疫的情況。他和太太亦早在日本政府未宣佈停課前已經向學校請假一個月，就是想專心抗疫。「但始終只有兩個人，人手唔夠，物資亦唔夠。」 Joe開設專頁後，不少香港朋友知道他有心幫助日本朋友，主動捐口罩寄給身在日本的他，「當中有啲係之前喺日本買咗口罩返香港，而家夠用，就寄返啲過日本，希望可以分享返畀日本朋友。」
信政府「日本人 覺得只比流感嚴重」
「正如我啱啱收到嗰盒郵件上寫住：相爭不足，共享有餘。」早前合共收到約二千個口罩，Joe先由自己的社交圈開始派口罩，「學校，仲有教會，仲有跑會。」除了派口罩，還有開設日文專頁宣揚抗疫的重要性，「日本人太信政府，覺得政府話乜照做就OK，又覺得呢個肺炎只係比流感嚴重少少，死亡率唔高，所以希望多啲人早啲發現個嚴重性。希望先幫身邊嘅人，再靠大家宣揚畀其他人。」太信政府的確容易出事，如果香港只靠政府抗疫，不是民間自發嚴防，情況不敢想像。
除了捐給身邊日本人，Joe也和一些慈善機構聯絡，「例如京都有幫助無家者嘅組織，之後都會捐一啲畀佢哋。」但日本人口過億，口罩派得幾多？「所以早前就同太太研究製作布口罩，除咗可以派畀身邊嘅人，亦會將教學放上網。喺網上搵到好多香港人教製作布口罩，但日本就唔覺，之前都唔見有布口罩呢樣嘢。」
通宵製作 太太成為「口罩藝術家」
專程買衣車和物料，停課不停工，Noel常常通宵車布口罩，「一日最多做到十個左右，而家做咗約五十個。」雖然香港有不少有心人想捐錢給他們，不過Joe拒收捐款，因不想牽涉錢銀，「我會改為叫佢哋捐布口罩嘅布料畀我哋。」一向對手工藝有研究的Noel都有花心思設計，「之前試過喺口罩側邊放入filter，最後都係喺下邊放入比較方便。而且我哋喺箍耳橡筋位置打咗兩個結，可以調校鬆緊。」 Joe聽到後在旁邊笑說：「佢就快變口罩藝術家。」
留學日本最想是深度體驗日本文化，不過Joe和Noel留學日本一年的體驗還不及這一個月深。「日本人好怕打攪到人，所以好少亦未必識同其他人求救，有時會拒絕其他人嘅幫助。因為咁我先由身邊認識嘅組織開始派。我記得當時我問教會牧師，好唔好派口罩畀鄰居？牧師問我點派，我話敲門派畀佢哋囉，牧師就話千祈唔好，咁樣佢哋會唔好意思收。」 Joe之後在教會派口罩，尚算順利，亦因為他不停宣揚抗疫意識，「我參加嘅教會一早已經取消茶點環節，亦減少近身接觸，加闊座椅之間嘅距離，又進行YouTube直播，以減少出席人數。」
Joe在香港跑步界有「馬拉Joe」之名，在香港亦有跑姿教練牌。和他談到日本馬拉松，「留學嘅功課好忙，只係跑過琦玉馬拉松，不過練得少，跑得麻麻。」全馬跑幾耐？「三小時十九分。」要五小時完成全馬的記者聽到這個時間和「跑得麻麻」幾個字，只能夠回應：「哦。」
請纓訓練陳健民 「抗疫都係一場抗爭」
Joe和Noel分別以五字頭及四字頭之齡留學日本，Joe放棄跑步教練工作，Noel更辭去公務員工作，他們的決心是源於對政治的灰心，「早年立法會DQ事件，令我覺得香港政局好絕望，有啲灰心。太太又一直有去外國生活嘅夢想，所以就開始籌備。」離開前，Joe更是「佔中三子」之一陳健民的跑步教練，「二〇一八年底，喺佢facebook見佢提及跑渣馬半馬，但訓練時腳痛，嗰陣我已經計劃好去日本留學，等緊簽證，但總係覺得自己做得唔夠多，當知道接近六十歲嘅陳健民話要跑首次半馬，係為咗鼓勵身邊對民主運動灰心嘅朋友，我就自動請纓，經朋友介紹做咗佢嘅長跑教練。對一個民主運動灰心者嚟講，好似做多咗少少嘢，等自己去日本時內心好過啲。一直都有同佢書信聯絡，我都為佢整咗個獄中訓練計劃，等佢可以操練身體維持堅強意志，其中講到佢獄中跑步嘅情況，佢話出獄後一定要跑一次馬拉松，令我好感動。」 Joe說這次如此積極、主動搞抗疫運動，其實也深受陳健民影響。
不過，因為休學一個月，下個學期又準備開學，Joe及Noel面對兩難局面，「因為如果唔繼續課程，留學簽證就會完，可能短時間內就要返香港。但如果繼續留學，可能又會時間不足，做唔到好多。所以我同太太都考慮緊之後點。不過無論點，都會盡量做到最後。抗疫都係一場抗爭，盡做！」
Joe計劃在日本留學兩年，當中包括奧運期間，「作為一個運動愛好者，當然想現場睇奧運。」估計東京奧運最終會如何？「我真係估計唔到，心情好矛盾，又想搞得成可以睇到，但又驚會為疫情帶嚟更大影響。不過我早兩晚睇電視見到個調查，有四成半日本人覺得今次東京奧運最終未能如期舉行。」
布口罩DIY
記者：陳孝義
圖片由受訪者提供