【「蘋果尊訪」系列三】鄧兆尊是已故慈善伶王鄧永祥（新馬師曾）之子，自細含着金鎖匙出世，但童年最難忘的回憶，卻是四兄弟姊妹捱打的日子！兆尊日前接受《蘋果》專訪，指當年試過勸祥嫂民主一點，但卻換來一巴掌。捱打經歷太多，他惟有阿Q地將它當成欲哭無淚的笑話與人分享，他憶述年幼時曾怨父親「冇義氣」，但現在才領略父親不插手的智慧。
撰文：鍾國仁
祥嫂洪金梅對子女管教嚴格，鄧兆尊和弟妹從小就被祥嫂打大，而且是毫無道理的打，四兄弟姊妹常想如何逃過母親的藤條，但後來才發現，無論做得對或不對，結果都一樣。兆尊表示：「我阿媽嚴到你唔信，嗰時最細個妹未出世，如果三兄妹中是但一個考試或測驗唔夠80分，係一齊冇得睇電視，阿妹成日都係70幾分，成日冇電視睇，有時會出吓蠱惑叫醒阿爸，去阿爸間房睇，如果阿媽唔畀，咪喺窗口望隔籬屋嘅電視囉！」
一人犯錯集體受罰
兆尊說：「阿媽嚴到係一個犯事三個打，記得有一次我阿媽話『我好民主嘅，我有乜唔啱，你哋講出嚟，我會改。』我妹（小艾）係咁掹住我衫尾話『唔好講！會死人！』當時我仲同阿妹講唔怕嘅，佢好民主！點知講唔夠兩句，佢已經一巴打過嚟！」
兆尊曾經將童年被母親打的經歷當笑話告訴朋友：「我曾經講過個笑話畀人聽，話放學返嚟，一入門口就俾人打，我問點解，佢話因為你冇執床，想執死啲工人呀！咁當時我覺得都講得啱，咁第二日咪起身執埋床先返學，點知放學返嚟一入門又打，佢話你執晒啲床，工人邊有嘢做！」
當時兆尊只是12歲，不知所措下喊住向父親求救：「老竇話『畀我諗陣，轉頭答你』，後來老竇教我『你好似我咁，唔落床咪得，唔使俾人打！』但老竇唔使返學，我要！後來咪好似開大細，一時執一時又唔執，我哋後來都知，因為阿媽起身時腰痠骨痛，要搵人鬧吓，你唔好彩俾佢eye contact咪死咗囉！」
兆尊和弟妹為了避打，試過幫母親約麻雀腳在外打牌，讓祥嫂長時間不在家：「好咗一輪，後尾佢識破咗，返嚟屋企打，不過有時佢差一隻麻雀腳，要我哋幫手砌牌，咁我就講，幫完你唔好再打我哋，因為有朋友喺度，佢會話OK！」
兆榮駁嘴被鞋摑面
從小到大，祥哥都沒有打過兆尊四兄妹，兆尊說：「阿爸好似細路，但又係聰明人。」他指祥哥每當老婆執行家法，總會很自然避開，兆尊曾指父親冇義氣，豈料祥哥話：「『我係冇義氣㗎啦！你哋捱得打，我唔捱得嘛！我都喺背後支持你哋！』阿爸真係得啖笑！」現場沒有入鏡的小艾為父親辯護：「其實阿媽多數係揀老竇瞓緊覺嘅時候打我哋，每次要我哋四個一字排開跪喺度，佢總係打我先，有次細佬（兆榮）俾阿媽打時話識童子功，打佢唔會痛，阿媽聽到仲嬲，成隻鞋車佢塊面幾吓就問細佬『唔痛吖嘛？』佢痛到流晒眼淚，喊住話未練上塊面度，阿媽同我哋都忍唔住爆笑！」
祥哥和祥嫂相繼離世，沒有了父母這把保護傘，會否感到人情冷暖？兆尊笑說：「阿爸喺度時當然好多人畀面，記得以前屋企後巷可以泊車，但阿爸走咗後，後巷突然多咗兩條鐵柱唔畀泊！偶然有掛住阿爸，諗返起細個成日伏喺阿爸背脊都幾開心，可惜我冇小朋友，唔知個仔伏喺隔籬係點。」
下回預告：鄧兆尊被祥嫂強迫入行做藝人，祥哥就叮囑他不可亂搞男女關係。