疫情喺英國不斷擴散，英超更已落實唔會早過4月30日重開，當地唔少靠球賽進行而謀生嘅人可以話係手停口停，生計受到影響。不過，曼聯都算係良心企業，周四喺官網宣佈就算英超餘下賽季會取消或閉門作賽，亦會向球會嘅3,000名臨時工出糧，總計約100萬鎊（約890萬港元）。
曼聯周四喺官網公佈呢項消息，仲話臨時工對球會服務起關鍵作用，希望可以減少臨時工面臨收入不穩嘅危機，球會執行副主席活華特話：「我哋靠住呢班好員工（圖），先可以為奧脫福球場嘅球迷提供出色嘅服務同體驗。大家正面臨前所未有嘅情況，我哋希望為員工提供保障，無論今個賽季結局會點，希望大家可以快啲返嚟奧脫福球場。」
曼聯將會向過去三個月曾經為球會所有比賽日或非比賽日嘅臨時工出糧，但同市富豪級球會曼城，反而被投訴懶理臨時工嘅生計，多名喺比賽日協助管理、接待同餐飲工作嘅臨時工恐失去收入。
英超就話臨時工生計受影響，但英冠同較低組別嘅球隊就因為冇比賽日收入而面臨經營危機。英冠、英甲、英乙球隊唔似英超有龐大嘅轉播同廣告收益，比賽門票係佢哋主要嘅收入來源，家陣聯賽暫停，英冠榜首嘅列斯聯到英乙榜下游嘅馬爾斯菲都面臨經營困難，有指球會希望球員能夠減薪同球會共度時艱。更有啲英甲、英乙球隊喺今個月已無法向球員出糧，假如繼續停賽，高達六間球會將面臨破產危機。
慕遜加柏球員自願減薪
放眼其他地方，德甲嘅慕遜加柏啱啱因為聯賽停擺蝕咗200萬歐元(約1,600萬港元)，球員竟主動接觸球會表示願意減薪，但瑞士聯賽球隊錫永就好冇人情味，聯賽喺3月1日停擺後，周三決定解僱陣中多達9名球員，當中包括前阿仙奴球員桑治同佐奴等，有指瑞士球員工會已對解僱提出抗議，球員正尋求法律諮詢。