石油價格最近大跌，左丁山以為中國係全世界最大石油進口國，應該受惠不少。點知相識幾年嘅朋友鄺社源另有一番話講。記得三年幾前，佢就同左丁山講過，中國在國際上買石油，有時係政治安全第一，價格高低第二。講政治，就幫最友好、可靠嘅國家買啦，其次係同石油大國買，保證供應充足。邊一個國家中國認為最可靠，而且仲要有大把石油出口嘅呢？數手指只得一個，就係俄羅斯，本來委內瑞拉都向中國靠攏，有大量石油供應，但鄺社源話委內瑞拉石油係重型，含硫量過多，過往主要靠美國油公司技術將重油變成輕油，美委交惡後，中國買入委內瑞拉原油會增加成本，更何況馬杜羅管治下嘅委內瑞拉，已經國不成國，經濟陷入崩潰邊緣，欠中國債不還呢！
近星期油價不斷降低，係因為沙特阿拉伯與俄羅斯不能達成減產協議之故，沙特皇儲一怒之下，與普京鬥氣，向中國賣石油，每桶減價6至8美元，搶俄羅斯市場份額，弄成兩敗俱傷局面。鄺社源係石油工程師，在石油界任職數十年，已經係教授級人馬，現已退休，常年遊埠，但依家周圍唔去得，咪寫吓稿囉！
鄺教授用電郵傳來3月12日在經濟日報發表之「美趁疫症當前，遏油價痛擊俄」，指美國頁岩油不怕低油價，趁冠狀病毒當前，世界石油需求大減之際，趁時機推低油價，害俄而唔益中國。害俄大家都明，何解低油價益唔到中國？鄺教授指：「中國現時是全球最大石油輸入國，日用石油1200萬桶，但完全沒有油價的話語權，不過因為近期的冠狀病毒，使石油需求每天下跌了300萬桶，所以雖然現在油價大跌，也買不下，正是賤物鬥窮人，得個睇字。而中國在2000年時與俄國的長期供油協議中，油價是訂在140美元左右，且每年有加價機制，不能不買！這也說明了為甚麼無論油價怎樣跌，國內的成品油價格只能高企不下。故美國選擇在此時下手，就是趁中國最佔不到便宜的時候！」。
普京不愧係老KGB狐狸，吃定中國，佢在2000年5月7日上任俄羅斯總統，與江澤民打交道，江澤民今日已成北京當權派眼中廢老，普京仍然大權在握，鬥爭經驗比2012年掌權嘅習近平更堅實，唔怪得中國不能擺脫俄中長期供油協議，吃晒大虧。俄羅斯自清朝康熙年間，開始與中國搞外交，三百幾年來屢佔便宜，逐漸霸佔中國土地，以百萬平方公里計，至今習近平不時聲稱中國土地寸土不讓，但對俄羅斯就友好到不得了，粒聲唔出，老大哥即是老大哥，冇得好講。