香港抗疫權威袁國勇教授前日同徒弟龍振邦醫生（圖），喺《明報》投稿最後搞到要「撤回」道歉，而篇文就喺網絡瘋傳，八方身邊老友各自拋出唔同睇法，有人認為袁教授講真話被打壓，但亦有人估佢係「明知故犯」，袁教授極速接受深圳衞視訪問，一句「或許沒人比我更愛國了」真係可圈可點啦！
大家將焦點集中喺袁國勇身上，對另一作者龍醫生可能有啲陌生，查實佢喺行內唔少人識，前年底醫委會改選，佢同醫學界立會議員陳沛然醫生雙雙當選委員；2016年特首選委選舉，龍醫生係真普選醫生聯盟成員，當日佢感言：「顯微鏡內黑漆漆的盡頭綻放一絲光明，生命就在有光的地方卑微的活着。哪怕只是一口氣，也不會輕言放棄。要逃離黑暗的幽谷，唯一的辦法是穿越黑暗，朝着有光的地方走。逃避只會讓黑暗蔓延，潔癖並不能驅逐污穢。」呢段說話家陣睇，另有一番滋味。
龍醫生以前都有同袁教授一齊投過稿，仲被人咁介紹：「傳染病及微生物科醫生，專研小兒科傳染病。愛憶舊懷古，以史為鑑。」今次篇文開首一段咁寫：「己亥冬，疫發武漢。庚子春，湖北大疫，國內疫者八萬餘……」睇到呢度，大家係咪同八方一樣都心照明白了呢？