現年38歲的譚凱琪與拍拖八年的富貴男友莊日宇（Enrico）在今年2月正式入紙登記結婚，當時譚凱琪表示日子尚未決定，而且亦想低調處理。昨日譚凱琪在社交網貼了數張婚紗和裙褂相，宣佈與Enrico成為夫婦，她以英文留言指跟Enrico對彼此充滿好奇，因此決定餘生都在一起，還留言多謝大家的祝福。
推兩劇辦婚事
雖然譚凱琪貴為豪門新抱，不過她婚照所佩戴的首飾未見太浮誇，她戴上一套珍珠耳環和頸鏈，同時戴上五對龍鳳𠼦。而另一張婚紗相則以簡約為主，相中譚凱琪與Enrico深情對望，幸福滿瀉。昨日有報道指譚凱琪疑雙喜臨門，陀B未夠三個月，決定推劇請幾個月假養胎，她回應時也承認因有家事而推辭兩部劇，暗示暫時不透露太多望大家明白，昨日她貼出結婚相，相信她請假原因是先要籌備婚禮。
譚凱琪昨日回覆傳媒時說：「本身婚禮設於海外，但因為疫情下暫時要延遲，不過老人家準備咗個好日子，我哋都尊重佢哋嘅意思，喺呢個日子先進行一啲儀式。但係喺呢個情況下，我哋都唔想打搞到太多親朋好友，所以嗰日喺摯親嘅見證下，進行咗斟茶同簽紙儀式。」她還說：「嗰個場面真係好溫馨、好感動，尤其喺斟茶嘅時候，屋企人對我哋嘅寄語，搞到我好感動，忍唔住喊咗出嚟。」但譚凱琪否認是雙喜臨門。
好友未能見證
「少婦聯盟」成員沈卓盈、龔嘉欣和陳凱琳，她們均表示因為有工作在身，所以未有出席婚禮，不過日前已經與譚凱琪開一個婚前派對，龔嘉欣說：「結婚前一日都幫佢佈置婚禮嘅嘢，見到佢真係好用心去籌辦。」至於禮物方面，沈卓盈則稱大家商量後再決定。
採訪︰唐琛悠