參與公民抗命被判入獄嘅佔中三子陳健民（KM）上周六出獄後，唔少香港人都關注佢嘅動向，不過佢似乎想先休息吓。佔中九子之一嘅民主黨李永達噚日就喺facebook透露，向來關心佔中九子嘅陳日君樞機前晚特別為KM補祝61歲生日，不過九子之一嘅張秀賢就冇現身，原來因為佢早前出席過有元朗區議會副主席麥業成嘅會議，而麥業成個仔後來確診武漢肺炎，因此張秀賢要自我隔離被迫缺席，餘下嘅佔中八子都有出席，更同KM傾足兩粒鐘。
睇警暴片睇到胃痛
前晚有份出席KM生日會嘅邵家臻話，席間食咗個印有佔中九子合照嘅生日蛋糕同三文治，陳樞機更預告遲啲會整自己至拿手嘅東坡肉畀KM食；而前晚唱得最多嘅並唔係生日歌，而係《願榮光歸香港》，邵家臻透露大家總共唱足三次，仲連大戲版嘅《榮光》都睇理，透露朱耀明牧師早前探KM監時，都唱過《榮光》畀KM聽㗎！
阿臻話KM前日無意睇到一段popo打示威者嘅10秒短片後，即時感到胃痛，所以在場人士同KM老婆都勸KM唔好睇住。由於KM好關心場反送中運動，特別係中大嘅抗爭情況，在場嘅鍾耀華就用口述方式，講返自己對理大同中大兩場戰役嘅觀察。
李八方