視后李佳芯（Ali）去年因為呼籲市民登記做選民，即被內地網民指鼓吹「港獨」，雖然事後佢已多次否認，不過仍被內地網民狙擊及封殺，甚至更傳被無綫雪藏，結果《BB來了》續集和《踩過界II》相繼被飛。日前有報道指《白色強人》續集會喺10月開拍，喺前一輯飾演醫生Kennis嘅Ali，再度被飛出局。
接受角色已死
前晚Ali以嘉賓身份，喺將軍澳電視城錄影《流行經典50年》，對於再被飛嘅傳聞，Ali話：「我都係睇新聞先知，冇去求證，始終一日未開拍都仲有變數。𠵱家唔諗其他嘢，做好眼前嘅事，其他嘢交畀公司決定。」問佢如果冇份拍續集會唔會失望？Ali只係話：「其實喺上一集，角色Kennis係中咗槍，我都問過編審Kennis究竟有冇死，佢話對結局嚟講死咗係好啲，聽完佢咁講，我都接受Kennis係死咗。」
至於幾時再開劇，Ali話暫時未有消息，又指演員永遠係被動，目前佢先計劃暑假推出散文集，內容主要講生活上嘅軼事。
子羚認見舊愛
同場有同樣擔任嘉賓嘅姚子羚，對於被指同前男友楊偉文（Raymond）孖住出席聚會，疑似復合，佢大方回應：「其實係朋友聚會，我有出席，佢亦在場箒。」咁究竟兩人係咪復合？佢話將來嘅事將來先算，𠵱家佢只係想做好工作先。問到同Raymond係咪再見亦是朋友，大家仲有冇聯絡？子羚話：「一直以嚟都係朋友，即使以前都係，我想話大家都係成年人，而且我同以前嘅男友，都係可以做返朋友。」
撰文：馮仁昭