自古以來很多人都想延長壽命，各專家學者亦想盡辦法，絞盡腦汁去幫助我們。《蘋果日報》的讀者們有福了。今天就為大家揭開如何能不花分毫而長壽的秘訣！
長壽嘅秘技就是……少啲玩電話！！！
根據研究，本地孩子每天平均用兩個多小時玩手提電話。常常玩手提電話不單會增加過度活躍症的風險，也可能會增加長大後患情緒病的危險！如果可以的話，孩子們應該盡量減少玩手提電話。當然家長們也應該以身作則，減少在孩子面前玩手提電話。
心水清的你一定會發覺，只要減少玩手提電話，每天就會多出約10%的可用時間，其實即係等於延長實用生命10%！大家千萬不要看小這10%，以整個人生來說，這可相當於增加實用生命約七至八年啊！
多出來的時間當然我們要好好運用。要記住，唔係條命長咗10%，而係有用嘅實用生命多咗10%。道理就好似建築面積同埋實用面積嘅關係一樣，建築面積好大但實用面積好細都係冇用嘅，所以條命好長但可用或實用生命好少也是可惜啊。
當然你可能會話條命咁長做乜？
條命長都要有健康嘅體魄先至得嘅！所以（哈哈）大家仍然應該爭取時間做運動，每天最少做運動30分鐘，一個禮拜最少做五天。最簡單就係平路上快速步行30分鐘。善用生命就係培養嗜好、貢獻社會及豐富人生。
但是長命又不開心又點算呢？
好問題！所以如果有咗長命又有健康就應該更加注意心理健康啦。睇多啲正面嘅資訊同令人快樂嘅文章（如敝專欄）同書籍都好重要，抽時間做正念（靜觀）練習亦都有用，另外當然係要做好事同做好人啦，一個人心安理得就自然開心快樂啦。對身邊嘅人好啲（例如老婆同個仔），好多嘢做嘅時候幫吓同事，捐贈口罩畀有需要嘅人等等都會令一個人快樂㗎。
希望大家都開心、健康又長命百歲！恭喜恭喜！
林煒 精神科專科醫生
想輕輕鬆鬆健康啲，記住留意健康蘋台
http://health.appledaily.com.hk/