中國外交部唔妥美國早排將五間官媒駐美機構列為「外國使團」，於是向《紐約時報》、《華爾街日報》、《華盛頓郵報》等五家美媒開刀，禁止佢哋美籍記者喺港、澳同中國境內繼續採訪工作。
網民：默認管唔到？
中國外交部向美國亮劍，好多內地小粉紅拍晒手掌，覺得祖國又顯國威，但係香港網民就唔係咁睇，好多人問，乜台灣唔係中國不可分割一部份？為乜禁令只提香港、澳門，但係冇咗台灣嘅？
好多網民睇完外交部份聲明都問，「台灣是中國不可分割一部份」呢句嘢，邊個官方機構講得最多，外交部認第二，冇乜人敢認第一，所以外交部冇可能唔記得台灣呢片「領土」，但點解只禁美籍記者喺港、澳採訪，又唔講埋台灣，自行放棄呢片「領土」嘅主權呢？
更有網民揶揄，今次外交部聲明係咪默認，台灣其實唔算中國領土？所以中國政府根本管唔到班美籍記者喺台灣採訪？外交部發言人係咪又要澄清吓呢？