利物浦究竟贏唔贏到今季英超？今季英超會唔會爛尾？預計今日就會有答案！英超賽會同20間英超球會周四開會，決定19/20球季點收科。到底會點處理英媒各有說法，其中有指英超賽會堅持一定會完成今個球季，餘下92場比賽就改為全部閉門作賽（圖），同埋改喺中立場踢，而所有比賽都會有電視直播。講真，英超賽會同各隊都心知肚明一定要完成今個球季，因為有英冠球會話明，如果真係如早前咁講今季英超踢唔完就冇降班，由列斯聯同西布朗升班就算，下季英超變22隊，咁其他英冠球隊就會告上法庭。為免手尾長，英超都係寧願開快車，就算利物浦要閉門贏冠軍都要踢完今個球季。