【本報訊】武漢肺炎疫情下，全港學生自2月起停課最少79天，在家「困獸鬥」。有雙職家長難以抽空跟子女一起學習，也有家長認為網上學習成效欠佳，「同自己教過無分別」，大呼吃力。有教大學者指很多學校還未交代復課後具體安排，有家長已開始安排子女到補習社「追進度」。
記者：程詩敏 羅惠儀
育有一子一女的Peri，疫情期間需在家工作，加上跟進子女學習，「個人易暴躁咗。如果要開會真係要鎖自己入房，因為仔女未見過我開會嘛，唔會為意要唔好騷擾你，無時無刻有需要就會叫媽媽。」她要求子女跟足平日上學的時間表起床梳洗，之後看學校當日的短片或閱讀，午飯過後才可以玩耍。「𠵱家啲時間表打到亂晒，有時要顧佢哋e-learning，完咗佢哋要打機玩遊戲，又要限住時間畀佢哋休息，呢啲會打亂自己工作節奏。」
Peri女兒Aurora讀小四，念直資學校IB課程，一星期大約有九項功課，包括中、英、數，大部份是專題形式；兒子Bacchus念K3，每星期有中、英、故事課，老師會以短片形式教造句、寫字和講故事。Aurora喜歡停課，因較多時間見到媽媽：「e-learning如果唔識嘅話可以直接問佢，咁咪可以慳時間囉。」Peri指出，兒子較難專注看影片，也不知從何入手，「幼稚園好多抄寫認字，用e-learning會比較單向，我同佢哋一齊睇之餘，仲要寫一次等佢去copy（複寫）。繼續放假落去冇咗成半個學期嘅學習，我會擔心佢去到小一銜接唔到，或者突然深咗佢會吃力。」
專家促學校供教學指引
陳書的小二女兒陳曦就讀津校，停課期間使用Google Classroom上載功課，部份屬抄寫，學生完成後須掃描才能上載，程序繁複；中英數、常識科甚至音樂亦有教學短片，每星期約兩條。陳曦靠外祖父照顧，往往留待父母夜晚下班才能陪她網上學習：「不少家長朋友都面對這個問題……老師不是直接教小朋友，她有疑問未能即時問。」陳書續指，對初小學生來說，若沒有家長從旁解釋，即使老師講解詳細也難以專注看畢短片，估計女兒只能理解四成內容。「都是照讀一些教材，當然有用心思篩選整理教材，始終都要大人重教一次……我不抗拒做，不過在夜晚有限時間去做，大家都很辛苦。」
香港教育大學幼兒教育學系助理教授劉怡虹說，學校未有明確復課計劃，家長壓力越來越大，近來開始讓子女到補習社「追進度」。「（復課）係會重新教過定係現有的教材已經當教咗？家長擔心跟得唔足，會同人哋有落差。如果學校啲功課繼續係咁多，不停湧埋嚟，而畀家長支援唔夠，佢哋無可奈何會覺得（補習）係一個出路。」劉建議學校多給家長建議，「如果有啲指引畀家長，學習重點係乜，你（家長）可以問咩問題，有啲咩延伸問題你可以考慮。」劉續指，教授幼童的短片最好不超過三分鐘，中間要有音效和圖畫吸引幼童注意。