為咗阻截武漢肺炎疫情爆發，特區政府之前宣佈由內地返香港嘅人要強制隔離14日，一般人見到隔離令多數都會避免返去內地，點知新民黨主席葉劉淑儀前日漏夜去珠海，仲過咗一晚夜，噚日下午返香港接受強制隔離。雖然佢只係話處理急事，但引起一啲政圈中人無限聯想，猜測葉劉係咪要上大陸見京官，所以明知要隔離都要去？
話有私人理由唔方便透露
葉劉喺facebook發文話，前晚因急事去咗珠海一趟，返香港嘅時候已簽署由衞生署發出嘅強制檢疫令，意味佢由噚日開始要在家自我隔離14日，直到下月1日先可以返工同出席活動，佢已經知會立法會同行會，其間會喺屋企處理公務，如常工作。八方問過葉劉去珠海原因，佢只係話私人理由，唔方便透露，總之就係噚晚有急事所以過咗去，噚日5點幾返香港，住咗一晚酒店，同佢同行嘅司機都一齊接受隔離。
至於隔離14日有乜做？出咗名係工作狂嘅葉劉話會繼續喺屋企處理文件，又叫同事照樣send嘢畀佢，另外佢都download咗政府檢疫App，每日量體溫，同埋報告身體狀況。
雖然葉劉冇講因乜「急事」急到要隔離14日都上珠海，但好多政界中人猜測，葉劉一冇生意喺大陸、二冇聽佢有乜至親係入面，急成咁自然唔簡單，有人估可能要上大陸見京官。因為自武肺爆發之後，大陸搵人落香港傳話難咗好多，咁自然係有急事要見，就叫建制派北上，反正要隔離14日都係班建制人士受，至於乜嘢「急事」？係叫葉劉拆掂容海恩與李梓敬之爭？還是去為777向北京篤過背脊解畫？
李八方