難怪葡萄牙球星基斯坦奴朗拿度（C朗）死都唔肯返意大利，佢效力嘅祖雲達斯喺周二宣佈，法國中場馬度迪都感染咗武漢肺炎，成為繼魯加尼後第二位中招嘅祖記球員。加埋維羅納都宣佈中場薩卡尼都中咗武漢肺炎，連同早前確診嘅7名森多利亞球員以及3名費倫天拿球員，截至周二，確診武漢肺炎意甲球員已經有13人，夠排一隊波，仲有兩個後備。
意甲確診球員湊足一隊波
32歲嘅馬度迪係法國贏得2018世界盃冠軍功臣之一，祖雲達斯喺聲明中話︰「馬度迪接受咗檢測，結果係陽性。佢3月11日起已自願居家自我隔離，佢會繼續受到監察，目前感覺良好，並冇症狀。」馬度迪隊友魯加尼上個禮拜三成為確診武漢肺炎嘅第一位頂級聯賽球員，令祖雲達斯全隊都需要隔離。C朗就返咗祖家葡萄牙，不過佢近排運氣真係麻麻，媽媽早前中風、隊友就接連中招、開嘅酒店又被誤傳變火神山，連避難嘅家鄉日前都發生地震，唔通C朗今年犯太歲？
至於24歲嘅維羅維球員薩卡尼，由於球隊3月8日曾與最多人中招嘅森多利亞對壘，因此已自我隔離。維羅納喺聲明中話︰「薩卡尼目前狀況唔錯，近日只係發咗幾次燒。佢同成支維羅納居家自我隔會離會延長到3月25日，並繼續受到監察。」
愛奴六人確診武磊或中招
另一個疫情非常嚴重國家嘅西班牙，愛斯賓奴周二就宣佈一隊有六名職球員中咗武漢肺炎，仲全部均有症狀，至於中國前鋒「武球王」武磊有冇中招自然令人關注。據西班牙傳媒報道，愛斯賓奴嘅做法好奇怪，唔係全隊接受檢測，即係武磊有冇接受檢查都唔知。
據《每日體育報》報道，已確診嘅檢測係周一做嘅，球隊根據健康指引，對出現症狀嘅人先進行病毒檢測，結果全部呈陽性中招。不過，由於唔係全隊檢測，而愛斯賓奴又唔肯公佈確診球員姓名，武磊有可能都冇接受病毒檢測。不過愛斯賓奴其實都打定輸數，話明唔排除未來仲會有更多確診個案。