呂慧儀同張景淳喺劇集《愛．回家之開心速遞》合演情侶，呢對「龔水配」大受歡迎，日前係「龔水」喺劇集拍拖一周年，劇集原定前晚播出一集繼續食住「龔水」線，預告片見到張景淳演嘅龔燁，原來鍾意收藏水手服少女模型，亦會cosplay美少女卡通角色，引起呂慧儀飾演嘅熊若水不滿。
不過預告一出，有fb群組就不滿劇組亂改經典動漫公仔，又投訴對白有貶低動漫文化之嫌，群起向無綫投訴。有人爆料曾收到內部通知，分別將五款《美女少戰士》及一款《LoveLive！》 分別改色，有網民於是質疑無綫涉嫌侵犯版權，結果前晚劇集臨時變動，將「龔水」故事抽起，改播圍繞蘇韻姿飾演嘅熊心如為主線嘅故事。
呂慧儀感謝意見
呂慧儀前晚喺Ig貼出劇本，顯示第818集標題係《女戰士之心結》，佢似乎有啲怨氣話：「預告並非故事的全部，所有的想像，源於自己的心所向，願人人能凡事往好處想，也許事實比想像的好。感謝喜歡我們的你們，感謝給予意見的有心人，我們都在努力，我們渴望進步。」而劇集導演亦喺Ig解釋，指劇中模型的確係買現成公仔改造，願意將該集修改後再播出。
撰文：馮仁昭