武漢肺炎害人不淺，越嚟越多球會啲職球員相繼確診，意甲暫時最大鑊係森多利亞，而西甲就一定係華倫西亞。喺加雷、文加拉同荷西加耶等球員先後交代自己受感染後，球會仲喺周一公佈咗一個恐怖數字，就係全隊已經有35%職球員確診，只係全部個案都冇症狀。武肺一直有指係因為內地人食蝙蝠等野味而爆發，估唔到今次有「蝙蝠軍團」之稱嘅華倫真係中到應。
記者爆12個1隊中招
華倫官網講明話今次染上呢個病毒，就係球隊上月去完米蘭中立場踢歐聯16強首回合對阿特蘭大之後，喺隊內爆發同擴散嘅，皆因佢哋離開幾日後，米蘭所屬嘅倫巴第大區已被意大利當局列為高危地區。華倫話即使賽後已經採取嚴格措施管制球員，但最新結果顯示，成隊有成35%職球員中咗招，而且所有感染嘅人暫時都冇發病症狀，目前全部都喺屋企隔離緊，接受醫療評估同進行預定嘅檢查。隨後有西班牙媒體嘅資深體育記者話，華倫家陣最少有12名1隊球員，喺病毒檢測中呈陽性，但就要等球會或佢哋自己上社交網絡，同大家交代先會知係邊幾個。
不過，西班牙球壇已經有人不幸因為今次中肺炎死亡，而且係一位年僅21歲、叫法蘭斯高加西亞嘅足球教練。佢喺西班牙安達盧西亞地區嘅馬拉加一支叫Atletico Portada Alta嘅球隊，執教兒童梯隊，早前證實中招，最慘係佢因為本身已經患有白血病，身體冇足夠抵抗力抗肺炎，最終確診短短幾日就離開人世。家陣喺西乙打滾嘅馬拉加，收到呢個噩耗後都有慰問呢間同區嘅地區球隊。
魯加尼女友都領嘢
至於首位確診武肺嘅意甲球員、祖雲達斯嘅魯加尼，佢另一半Michela Persico周一亦喺ig宣佈領嘢，認真慘情，但就透露自己家陣情況還好，叫大家唔使擔心。魯加尼日前亦透露，自己暫時喺屋企隔離緊，但就冇任何嚴重病徵，而佢覺得佢中招後畀到大家嘅最大啟示，就係等大家知道疫情嘅嚴重性。另外，已經退役嘅前阿士東維拉射手艾邦拉荷，亦喺ig自爆懷疑中招，話自己好似有齊晒所有武肺病徵，所以要自我隔離兩周，希望大家學吓佢留喺屋企唔好出街播毒。
疫境自娛：奧巴美揚慶結婚10周年
阿仙奴前鋒奧巴美揚（右）上周末與太太在家中慶祝10周年結婚紀念，他在社交網站表示雖然今年的紀念日在家中隔離，但仍為能夠與太太一起而感到高興。
