【爆相爆片】袁詠儀（靚靚）因老公張智霖上月出席撐警明星飯局，連累她與囝囝張慕童的Ig被洗版圍剿，之後兩夫婦於網上神隱。直至上周日她才於Ig貼背影相賀「三八婦女節」，原來當日她與囝囝身在泰國布吉旅遊，更被讀者周太透過《蘋果》「爆相爆片」分享。
周太於本月8日下午6時在當地Big C超市門外見到靚靚，周太說：「嗰度係Jungceylon Shopping Center，佢哋推住幾車嘢出嚟，應該剛剛喺Big C買完嘢。」短片中見到靚靚兩母子與親友一行約十人，但不見張智霖，各人穿上T恤短褲，可能天氣太熱，均沒戴口罩。眾人步出超市後，靚靚分發酒精搓手液，她等車期間不停搓，包括小腿及腳踭，5分鐘後由小巴接載離開。
採訪：李森