全球多國爆發武漢肺炎，港府規定明天起入境者需強制檢疫14日。傅明憲及王賢誌近日分別身在加拿大，王賢誌因原本回港航班取消而滯留，回港無期。回加國探望雙親的傅明憲，批評加拿大政府及市民防疫意識差，她要苦口婆心力勸父母，兩人才肯戴口罩避炎。
武漢肺炎在全球爆發，不少國家疫情嚴重，西班牙、美國、澳洲及秘魯相繼宣佈封關。特首林鄭月娥昨早稱外國確診及死亡個案均已多過內地，宣佈除中澳台外，向所有外地發出紅色外遊警示，全部入境者明天起均須強制檢疫14日。不少圈中人目前仍身在外地，傅明憲及王賢誌不約而同身在加拿大，兩人同批評當地人防疫意識相當薄弱。
傅明憲月初飛往溫哥華探望雙親傅奇和石慧，現時她於溫哥華附近的Big White Mountain滑雪。對於港府將實施入境後要強制隔離14日，傅明憲昨日接受《蘋果》電話訪問表示：「我本身訂咗機票月尾先返，唔會專登改趕返嚟，如果返到嚟要家居隔離14日，自己冇問題，因為喺屋企對住FiFi、文文同獅子頭（愛犬）係好開心嘅。」
頻撲超市入貨
在溫哥華是否難以購買口罩和消毒用品？傅明憲透露：「我去開嗰間超市都見有好多廁紙同日用品，口罩就見唔到啦，不過我唔想兩個老人家四圍撲口罩，所以今次返嚟已經帶晒畀佢哋，我喺香港一早買咗口罩、消毒藥水同搓手液，返到嚟又喺超市幫佢哋入晒廁紙同糧食，淨係去超市，我都走咗兩轉，其實我今次返嚟任務主要幫佢哋入貨，𠵱家乜都搞掂晒，足夠兩老用。」
傅明憲指當地很少人戴口罩：「其實加拿大政府對防疫係好鬆懈，我見到冇乜人戴口罩，戴嘅幾乎全部係華人，我父母初時都好抗拒戴口罩，但我最後都成功說服佢哋出街戴。我今個月初返到嚟，啲人完全冇意識防疫，反而係啲華人餐廳員工戴口罩，政府亦冇任何防疫宣傳片，反而香港喺呢方面做得好好，今次返嚟我都教父母點洗手同沖渠。」
餐廳陸續閂門
王賢誌家族經營的旅行社舉辦的南美團上月底出發，他也有隨團工作。《蘋果》昨日聯絡王賢誌，他表示剛好在秘魯封關前飛抵溫哥華：「我係搭加拿大航空，喺噚日，秘魯話封關前一日已經飛到溫哥華，本來準備18號喺溫哥華飛返香港，點知班機突然取消咗，𠵱家都未知改到幾時，但19號香港封關前我就一定返唔到香港㗎啦。反正我之前去咗秘魯同玻利維亞好多地方，諗住返到香港都會自我隔離14日，所以就算返到嚟要自我隔離，我係OK嘅，我都唔會周圍去。」
目前溫哥華會否因為疫情嚴峻，出現市民搶購口罩和物資等情況？王賢誌表示：「口罩好早已經冇，其他嘢又唔係冇，不過呢度啲餐廳都陸續閂門唔做生意。其實呢度外國人真係唔多戴口罩，見到戴口罩嗰啲幾乎全部都係華人，好彩我自己都有口罩同消毒用品，暫時都唔擔心嘅。」
採訪：魯吉