去年中反送中事件爆發後，有報道指足總一級球證、正職係交通警嘅廖國文事後喺社交平台發表針對示威者言論，包括辱罵示威者等；廖除被網民圍攻，足總早前未有安排佢擔任任何港超聯賽事球證，而本地賽事因武漢肺炎改為閉門作賽，足總先再安排佢「復職」，噚日將軍澳運動場進行嘅冠忠南區對和富大埔嘅足總盃八強賽事，就係佢第二場執法。有十幾名球迷知道廖擔任主球證後，開賽初段已輪流喺場外高呼「黑警」嚴正執法等，而廖喺賽事展開後幾次判決惹嚟對賽兩隊球員不滿；其中大埔中場陸志豪不滿南區球員舉腳過高，但廖未有判罰，陸志豪抗議被罰黃牌，有大埔職員喺後備席高叫兼大鬧「黑警」，廖國文同第四球證密斟幾句後，向呢個大埔職員判罰黃牌。大埔最後喺呢場足總盃8強以4:1勝出，四強會對富力。