歐洲球壇因為武漢肺炎疫情肆虐,各大聯賽幾乎已經全部停晒,唔少餓波嘅球迷,或者會將目光轉移到其他洲份,甚至一啲低組別聯賽。其中有「足球王國」之稱嘅巴西,雖然係南美洲最多人中招嘅國家,但今個禮拜嘅巴西波就閉門繼續踢,結果部份球隊好似甘美奧同保地花高嘅球員,喺周日州聯賽賽前都戴晒口罩出場,抗議巴西足總草菅人命,結果幾粒鐘後足總正式宣佈暫停國內足球賽事,抗爭總算成功!
「我哋都係會受感染嘅人」
巴甲球隊甘美奧,禮拜日喺南大河州足球聯賽主場迎戰低組別球隊聖路易斯,教練連拿度樸達盧比帶領成班球員,齊齊戴住口罩行出球員通道,同對手列陣嗰時都仲戴住,但正式比賽佢哋當然除咗個罩先踢,結果佢哋以3:2贏波。今場戰果唔係最重要,重點係向外界發出要重視球員健康嘅訊息,其中教練連拿度樸達盧比就係記者會度解釋:「呢個係甘美奧挺身而出嘅時候,戴住口罩係要提醒當局球員都係人,對病毒唔係免疫㗎!家陣全世界都停晒體育賽事,巴西足球係咪都應該停呢?」
至於上個月轉戰巴甲加盟保地花高嘅日本球星本田圭佑,終於喺禮拜日嘅里約熱內盧州聯賽上演「地標」戰,代表球隊主場迎戰低組別嘅班古,賽前本田同隊友一樣戴住口罩出場,仲拉埋橫額抗議喺疫情下仲要繼續比賽。結果保地花高喺28分鐘由本田射入12碼領先,除咗係本田為球隊射入嘅第一球,亦係本田職業生涯第100個球會入波,但球隊最終都係同對手打和1:1。
幾粒鐘後足總終跪低
面對一眾球星嘅抗議,巴西足總喺禮拜日較後時間終於宣佈暫停國內足球賽事,所以嚟緊周中嘅巴西盃都唔使踢喇,球員總算抗爭成功,但州聯賽就交番畀每個地區賽會決定。
同時喺中美洲嘅墨西哥超級聯賽亦宣佈踢埋禮拜日嘅比賽,將會因武漢肺炎疫情而無限期暫停,加上南美足協上禮拜四已經宣佈,自由盃同樣因疫情延期,中、南美洲唔少大型足球賽事都正式停擺,球迷連南美波都冇得賭之外,唔知本田幾時先可以再為保地花高上陣呢?