股市連日波動，有人歡喜有人愁，投資F不斷來短訊話好悶，因為跑馬佢冇得入場，朋友宴會頻頻取消，人在家裏閒得發慌。誰知天降發財機會，特朗普處理全國肺炎疫情掉以輕心，令華爾街股市失去信心，加上沙特皇儲與俄羅斯「萬年總統」普京鬥氣，釀成石油價格危機，引起股市、油市、債市大波動，股市每日升一千點，跌一千點，成為新常態。職業投機人士不怕市場大波動，最怕市場平靜如一潭死水，市場日日大上大落，仲唔係天賜良機？
投資F炒股炒匯炒期貨三十幾年，曾大賺特賺，夜夜笙歌，收市後在皇后碼頭坐遊艇過尖東登岸入城（中國城也），玩到癲，飲XO送蟹黃魚翅撈飯。又曾經大敗，幾乎落荒而逃，一鋪輸清。既有此經歷，佢對近三個星期市場波動，見獵心喜，重執鑊鏟炒期指期權期金，似乎時光倒流返回佢嘅精采中年。
呢日佢猛咁叫左丁山出去食午飯，碰啱冇事，於是應承佢，問佢去邊，投資F話：「今時今日，邊度都有位啦，即刻叫秘書打電話去七福。」於是準時到達七福，投資F唔信做蟹嘅，堅持要食蟹黃翅，話係七福精品，左丁山對此蟹黃記憶慘痛，成世人記得，因為1987年時與中貿林，易拉罐L等人在大會堂食午飯，食咗個蟹黃伊麵，之後就遇上大股災，左丁山走避不及，輸到眼光光，做咗好耐大閘蟹，所以呢日左丁山叫一個紅燒翅算數。問投資F做乜咁開心，佢話股市勁有波幅，賺錢容易也，年紀已大，唔使得咁多，又老早已戒咗入城啦（其實亦無得入，中國城、大富豪已執笠多年），咪食得豪啲囉。食得興起，問七福經理仲有冇深海靚魚，有就通知，一定幫襯。講起海鮮，左丁山嘅六舅經常到大埔街市買餸，佢話呢輪啲深水魚、大蟹、大蝦嘅價錢都比十二月便宜好多，檔販話畀佢聽，趁內地大款受困於封城封村，出唔到街，好多過往賣往大灣區嘅珍貴海鮮，都流落香江，益有力食家，一條活生生藍瓜子斑只售八百元，抵到爛。不過投資F話使乜去大埔街市箒，有靚嘢，七福自然會通知佢！唔講美食，講吓成功之道，投資F話最緊要勤力，守信用，大騎師如莫雷拉、潘頓都曾經在夜馬散場之後，親自打電話畀佢索騎，其他馬主亦有同樣經驗，此兩名大騎師亦有口齒，尤其是潘頓，有一次，潘頓預早三個星期前應承騎佢隻馬，後來有更好狀態嘅馬搵潘頓騎，潘頓都推掉，對佢講a promise is a promise。投資F話人地成功並非僥倖，本地華人騎師應該虛心學習㗎！