中國輸出武漢肺炎禍延全球，香港人正喺度全城齊心抗疫，「何已完」何君堯（圖）就偏偏千方百計添煩添亂，近排同藍絲組成「23同盟」製造民意話要就23條立法，早排佢發起網上聯署後，噚日仲去全港18區擺街站，用消毒酒精呃市民簽名。不過原來佢第一個聯署網已失效，相信係俾人舉報到冚旗，要再開一個新嘅，但即使冇摺埋，怕且都唔見得人，因為一早已經有人攻陷咗佢個聯署網。
手足攻陷 用程式自動簽
「何已完」上星期公佈首階段「戰績」，聲稱網上收集到百萬人簽名，但有人就同八方報料，話有手足寫咗個程式自動幫佢不斷簽名以測試真偽，發現程式簽名數字同對方更新報數好脗合，為咗令對手防不勝防，手足唔係日日出手，結果程式停機日子對方又剛好話要整理聯署唔公開報數。手足仲好有心，除咗搵大陸手機號碼填資料，亦包含621、721、831、101、1111同1117呢幾組數字，代表乜大家心照啦！最終賽後檢討，認為聯署真人簽嘅應該得四萬左右，「何已完」以為真係有百萬人撐？實係太天真啦！