早排自由黨黨魁鍾國斌同業界研究用可防菌嘅布製作可重用布口罩，希望畀買唔到外科口罩嘅市民應急，早排佢宣佈研發成功，仲開始生產，仲搵埋港大感染及傳染病中心總監何栢良幫手檢測。自由黨榮譽主席田北俊噚日喺fb發文，將一批鍾國斌嘅可重用布口罩捐畀香港總商會，但田少不忘暗寸話會生產口罩嘅總商會立會代表林健鋒，點解佢啲口罩冇咗影？
話說田少喺fb轉發香港總商會個po，總商會話收到田少捐畀總商會同事嘅可清洗重用口罩，仲好多謝田少對總商會員工嘅關心，喺疫情嘅艱難時期都守望相助。
話對方冇貨畀員工用
而田少喺佢個po講，最近佢送咗一批個抗菌布口罩畀香港總商會嘅辦事處職員，但點解佢要咁做呢？佢就話「聽講現任代表香港總商會嘅議員部口罩機冇咗影，又冇口罩畀啲幫手做嘢嘅員工，咁叫啲職員點返工啫？」之後仲加個hashtag「#我最鍾意多事」，玩嘢味相當濃呀！網民似乎好受落田少玩嘢，讚佢靚抽之餘，又叫佢不如派埋畀一啲基層打工仔，好似清潔工人咁。
田少畫公仔畫到出晒腸，係人都知佢講嗰個「現任代表香港總商會嘅議員」係林健鋒，之前林健鋒話已搵到廠房同機器生產口罩，並已開始試產，話到4月中可日產40萬個口罩，但既然已試產，應該多多少少有啲試產品，點解唔畀總商會職員試用吓呢？
李八方