冠忠南區噚日喺閉門舉行嘅足總盃八強，以1:4輸咗畀和富大埔8強出局，賽後傳出主教練鄭兆聰離隊消息，南區冇耐就喺社交平台貼文話同帶咗球隊五季既鄭兆聰分手，球隊會改由高尼路同貝可泓接手領軍。雖然南區打入菁英盃決賽，但近期表現認真麻麻，疫情閉門作賽後，踢咗5場贏得1場和咗1場，近三場輸晒，而上場聯賽慘敗畀傑志，有啲球迷話南區冇進步，而噚日對大埔場足總盃開局互有攻守，但因為自己連環出錯致敗，又失一盃。南區主席陳文俊賽後突然喺個人社交平台貼上「世上沒有不散之筵席，緣聚緣散」兩句，似係暗示球隊人事將有變動，而佢哋夜晚就公佈主教練鄭兆聰離任，餘下賽季由教練高尼路同貝可泓領軍。 鄭兆聰噚晚回應話職業足球講成績，成績唔理想，球隊作出改變係好正常。