求驗客手記:意甲料六月尾煞科 倡押後歐國盃

求驗客手記:意甲料六月尾煞科 倡押後歐國盃

歐洲足協會喺今日同55個成員國代表召開視像會議,相信對於今夏歐國盃決賽周,仲有歐聯、歐霸盃餘下嘅比賽點樣處理會有明確決定。

意大利成為武漢肺炎歐洲重災區,至今已經有好多個意甲球員中招,聯賽幾時重開,甚至可唔可以完成到都成問題。意足總主席格拉維拿就話,會喺今日個會度要求將今屆歐國盃延期,等意甲有時間可以完成今季賽事。格拉維拿話:「我會向歐洲足協建議將歐國盃延期,意大利球會投資同犧牲咗好多,可以完成球季會係對佢哋更公平同正確嘅決定。」格拉維拿預計意甲要到六月尾,甚至再多一個月先完成到,但佢強烈唔建議球員目前就復操,應該各自返屋企恢復身心健康先。

另外,有報道指現年70歲嘅瑞士足協主席布蘭克,周日確診染上武肺。佢喺月初去過荷蘭阿姆斯特丹出席歐洲足協年度會議,同唔少歐洲足協要員有接觸。同樣有份出席會議、塞爾維亞足總嘅兩名代表,主席高基薩同埋前哈化柏林射手彭迪歷亦都中招,唔通呢次會議變咗武肺溫床,參加者都有機會成為「歐洲足協會議家族」?