有「推特上最紅戰狼外交官」稱號嘅趙立堅，喺twitter上嘅言論真係嚇親唔少人，最近佢質疑美軍將武漢肺炎病毒帶到中國，就觸發美國國務院傳召中國駐美大使崔天凱交涉。侵侵大仔唐納德好火滾，忍唔住喺Instagram分享港獨人士受訪片段，話大家仲信中國就係低能。
話說唐納德前日喺Ig分享短片，係香港知名獨派社運人士鄭俠手持「香港獨立」旗幟，上年9月以英語接受訪問，疾呼「Donald Trump don't trust China. China is asshole！（特朗普不要信中國，中國是混蛋！）」，片段更被美國網民製成唔同嘅remix版本熱播。
唐納德話一般唔會分享呢類型影片，但由於中國外交部人員竟然將武漢肺炎源頭推畀美國，令佢認為係時候講出真相，希望美國傳媒同民主黨認清事實，中國政府並唔係誠實嘅夥伴，只係諗住如何稱霸世界，又叫唔信佢說話嘅人睇下中共幾星期前仍拒絕世界最先進嘅疾病控制及預防中心專家入中國幫手就知，批評仍然認為中國政府懷住好意嘅人一定係低能！