武漢肺炎嘅疫情最近持續喺歐美地區爆發，過去一個禮拜，不斷都有球員、班主同主帥不幸染病。雖然意大利總理孔特喺上個禮拜就宣佈意甲會暫停至下個月三號，但依然不斷有球員中招，單單森多利亞已經喺連續3日有多達7人確診，情況令人擔心。至於早前謠傳確診嘅祖雲達斯球星基斯坦奴朗拿度（C朗），近日又有新聞話佢將旗下酒店改裝成醫院畀肺炎患者養病，不過好似又係假新聞嚟。
早前祖雲達斯後衞魯加尼確診，之後就傳出C朗都喺病毒測試出現陽性反應，不過有馬德拉負責公共衞生工作嘅官員就表示，C朗喺事發之前已經返咗葡萄牙鄉下馬德拉探阿媽，並冇確診武肺。近日《馬卡報》又報道，C朗會將旗下兩間位於葡萄牙里斯本同埋馬德拉嘅Pestana CR7酒店改裝成醫院，用作對抗疫情，仲會免費畀一眾病人入住，就連醫護嘅人工都由呢位葡萄牙球星一手包辦，實在對得住自己「慈善球王」呢個名。
《馬卡報》都轉載
呢個消息本來係由C朗嘅老友卡爾斯喺ig發佈出嚟，《馬卡報》都有引用佢嘅貼文，但目前呢位C朗好友已經將嗰條貼文刪咗。加上目前Pestana CR7酒店嘅官方網站都冇任何會將酒店改成醫院嘅消息，所以呢單新聞嘅真實性仍然有待確認。
至於C朗已經唔係第一次畀假新聞困擾，之前曾經傳過今年佢會同意大利發展商合作，喺智利興建一間兒科醫院。但隨後C朗嘅發言人就出嚟話呢個係假新聞，C朗冇打算要喺智利起醫院，所以家陣仲未可以證實C朗將酒店改裝成醫院呢一件事屬實，而且C朗亦都未有喺網上提過呢件事，所以球迷唔使信到十足。
祖記隊友隔離唔怕悶
最近由於意甲停擺同魯加尼確診，令到祖記幾位球星都要留喺屋企隔離，可能係太悶嘅關係令到大家都要搵啲室內活動做吓。之前有傳感染武肺嘅保羅戴巴拿，早前喺網上澄清自己冇事之後，近日就喺ig上載自己喺屋企化身廚神，同女友一齊包餃子；至於馬菲斯迪歷特就響應網上嘅「在家挑戰」喺屋企「的廁紙」，亦都同另一半喺屋企打乒乓波。