【土瓜灣】陳豪日前喺土瓜灣開工拍攝新劇《陀槍師姐2020》外景，同場仲有即將為人父嘅羅仲謙，以及大眼仔張彥博。 當晚主要拍攝佢哋喺車內監視嘅場面，陳豪埋位時個樣好嚴肅，但導演一叫停機就回復輕鬆模樣。其間有兩名印巴籍女子認得陳豪，雖然大家都未有戴上口罩，不過陳豪無懼疫情，仍主動笑容滿面邀請fans合照，亦不時同路過街坊打招呼，非常親民。
羅仲謙同場
羅仲謙之後埋位，可能因為場口唔同，所以佢同陳豪未有交談，反而不時同工作人員傾偈打發時間。現場所見，拍攝車輛未有貼上無綫嘅logo，當現場工作人員發現有傳媒影相，就不時用身體阻擋鏡頭。
其實曾幾何時，成龍嘅一系列《警察故事》電影紅遍全球，警匪片或劇集亦一度係唔少觀眾心目中嘅首選，當年無綫炮製一連串以警察為題材嘅劇集，可謂叫好又叫座，例如《陀槍師姐》系列拍到第四輯，主角歐陽震華、關詠荷同滕麗名嘅演出令人印象深刻。直到近年警察形象暴跌，支持度一次又一次跌至新低點，有見及此，無綫亦一度停播同停拍以警察為題材嘅劇集，直到近日全城關注武漢肺炎疫情，才逐步復拍警察題材劇集，但為免影響進度，一律低調行事。今次《陀槍師姐2020》開拍，演員方面滕麗名同朱咪咪都可以留低，主角就改由陳豪同宣萱擔正。